అవిశ్వాసం ప్రవేశ పెడితే టిడిపికి మద్దతిస్తాం: ఈటెల

By Srinivas

Published: Monday, November 28, 2011, 15:43 [IST]

హైదరాబాద్: తెలుగుదేశం పార్టీ కిరణ్ కుమార్ రెడ్డి ప్రభుత్వంపై అవిశ్వాస తీర్మానం ప్రవేశ పెడితే తెలంగాణ రాష్ట్ర సమితి మద్దతిస్తుందని ఆ పార్టీ శాసనసభా పక్ష నేత ఈటెల రాజేందర్ సోమవారం స్పష్టం చేశారు. తెలంగాణ కోసం అసెంబ్లీలో తీర్మానం ప్రవేశ పెట్టాలని కోరతామన్నారు. తెలంగాణ ఉద్యమకారులపై పెడుతున్న పిడి యాక్టులను ఎత్తి వేయాలని డిమాండ్ చేస్తామన్నారు. రాష్ట్ర ప్రభుత్వం తెలంగాణ ఉద్యమకారులపై కక్ష సాధింపు చర్యలకు పాల్పడుతుందన్నారు.

కేంద్రానికి తెలంగాణ ఉసురు తప్పకుండా తగులుతుందన్నారు. తెలంగాణపై కేంద్రం 2009 డిసెంబర్ 9వ తేదిన ఇచ్చిన మాటను నిలబెట్టుకోవాలన్నారు. పూర్తి తెలంగాణ ప్రాంతాన్ని ప్రభుత్వం కరవు ప్రాంతంగా ప్రకటించాలని డిమాండ్ చేశారు. కాగా టిఆర్ఎస్వీ నేత సుమన్‌ను ఉదయం టాస్క్ ఫోర్స్ పోలీసులు అదుపులోకి తీసుకున్నట్లుగా సమాచారం. పాత కేసులకు సంబంధించి ఆయనను అదుపులోకి తీసుకున్నట్లుగా తెలుస్తోంది.

Published On November 28, 2011