మషాబుల్ అవార్డుకు ఒబామాతో పాటు మోడీ నామినేట్

By Pratap

Published: Tuesday, November 29, 2011, 13:45 [IST]

న్యూఢిల్లీ: సోషల్ మీడియాలో అనుసరించ దగిన రాజకీయ నేత కెటగిరీలో 2011 మషాబుల్ అవార్డుకు గుజరాత్ ముఖ్యమంత్రి నరేంద్ర మోడీ నామినేట్ అయ్యారు. ఈ కెటగిరీ కింద అవార్డుకు నామినేట్ అయిన నాన్ అమెరికన్ మోడీ ఒక్కరే. ఇదే కెటగిరీ కింద అమెరికా అధ్యక్షుడు బరాక్ ఒబామా కూడా నామినేట్ అయ్యారు. సోషల్ మీడియాలో క్రమం తప్పని కార్యకలాపాలతో నరేంద్ర మోడీ ప్రపంచవ్యాప్తంగా అందరి దృష్టినీ ఆకర్షించారు. తన వ్యక్తిగత ట్విట్టర్ ఖాతాలో ఎప్పటికప్పుడు ట్వీట్ చేయడంతో పాటు ఫేస్‌బుక్‌ను క్రమం తప్పకుండా ఆయన అప్‌డేట్ చేస్తుంటారు. తన ఆలోచనలను బ్లాగ్‌ ద్వారా పంచుకోవడాన్ని ఆయన విస్మరించరు.

మషాబుల్ అవార్డుల పోటీ ఫలితాలను డిసెంబర్ 19వ తేదీన వెల్లడిస్తారు. ట్విట్టర్, ఫేస్‌బుక్ వంటి వివిధ సోషల్ మీడియా అవార్డుల కోసం వోటింగ్ జరుగుతుంది. వోటరు ఒక్కసారి ఓటు చేసిన తర్వాత 24 గంటలకు మరో ఓటు చేయవచ్చు. మషాబుల్ డిజిటల్ కల్చర్, సోషల్ మీడియా, టెక్నాలజీలపై దృష్టి కేంద్రీకరిస్తున్న ఆన్‌లైన్ న్యూస్ సైట్. డిజిటల్ ల్యాండ్‌స్కే‌ప్‌లో అత్యంత ప్రభావం చూపిన కంపనీలను, ప్రజలను, ప్రాజెక్టులను మషాబుల్ గుర్తిస్తుంది.

Published On November 29, 2011