యూట్యూబ్‌లో పవార్ స్లాప్ సాంగ్, కొలావేరి రిమిక్స్

By Srinivas

Published: Tuesday, November 29, 2011, 14:31 [IST]

న్యూఢిల్లీ: కేంద్రమంత్రి, ఎన్సీపి అధినేత శరద్ పవార్ స్లాప్ సాంగ్ ఇప్పుడు యూట్యూబ్‌లో అందరినీ అలరిస్తోంది. ఐదు రోజుల క్రితం హర్వీందర్ సింగ్ అనే యువకుడు దేశంలో ధరల పెరుగుదలను నిరసిస్తూ పవార్ చెంప చెళ్లుమనిపించిన విషయం తెలిసిందే. ఈ స్లాపింగ్ సంఘటనను సూపర్ స్టార్ రజనీకాంత్ అల్లుడు ధనుష్ సినిమాలోని వై దిస్ కొలావేరి డి అనే పాటతో రిమిక్స్ చేశారు. కొలావేరి పాట ఎంతగా హిట్ అయిందో అందరికీ తెలిసిందే. ఈ పాటను తీసుకొని హర్వీందర్ - పవార్ చెంపదెబ్బ వీడియోను అమర్చారు.

వీడియోలో పవార్‌ను కొట్టిన తర్వాత హర్వీందర్ తాను ఎందుకు కొట్టానో పాట రూపంలో కొలావేరి రిమిక్స్‌లో వినిపిస్తాడు. పవార్ పై అటాక్ చేసిన వీడియోలో హర్వీందర్ పెదాలు పాటకు అనుగుణంగా కదిలేలా లిప్ మూమెంట్ పెట్టారు. ఈ వీడియోను నాలుగు రోజుల క్రితం అప్ లోడ్ చేశారు. ఇప్పటి వరకు దీనికి ఏడు లక్షల హిట్స్ దాటాయి. కేంద్ర మంత్రి చెంపపై కొట్టడం, కొలావేరి సినిమా పాట హిట్ కావడం ఈ రెండూ కలిసి రావటంతో వీడియోకు చాలా రెస్పాన్స్ వస్తోంది.

Published On November 29, 2011