వైయస్ జగన్ వర్గం ఎమ్మెల్యేలు: మరో వికెట్ డౌన్?

By Pratap

Published: Tuesday, November 29, 2011, 20:02 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి వర్గానికి చెందిన శాసనసభ్యులు ఒక్కరొక్కరే వెనక్కి వస్తున్న సూచనలు కనిపిస్తున్నాయి. తాజాగా, కాటసాని రాంభూపాల్ రెడ్డి కూడా వైయస్ జగన్‌కు దూరమై, తిరిగి కాంగ్రెసు వైపు వస్తున్న సూచనలు కనిపిస్తున్నాయి. ఆయన మంగళవారం సాయంత్రం ముఖ్యమంత్రి కిరణ్ కుమార్ రెడ్డిని కలిశారు. వైయస్ జగన్మోహన్ రెడ్డి వైఖరి కారణంగానే కొంత మంది శాసనసభ్యులు దూరమవుతున్నట్లు కనిపిస్తోంది. నియోజకవర్గాల అభివృద్ధి కోసం తాము కాంగ్రెసుకు మద్దతు ఇస్తున్నట్లు చెబుతున్నప్పటికీ తమ భవిష్యత్తుపై ఆందోళనతోనే వెనక్కి వస్తున్నట్లు చెబుతున్నారు.

సికింద్రాబాద్ శాసనసభ్యురాలు జయసుధతో పాటు శ్రీకాకుళం జిల్లాకు చెందిన కొర్ల భారతి కూడా తిరిగి కాంగ్రెసు వైపు వచ్చారు. కొర్ల భారతి తొలుత కొంత తటపటాయించినా ఆ తర్వాత కాంగ్రెసుతోనే కొనసాగాలని నిర్ణయించుకున్నట్లు చెబుతున్నారు. మరో శాసనసభ్యుడు శేషారెడ్డి కూడా తాను కాంగ్రెసులో కొనసాగాలని నిర్ణయించుకున్నట్లు స్పష్టంగా చెప్పారు. వెనక్కి వస్తున్న శాసనసభ్యులు ఎవరు కూడా వైయస్ జగన్‌పై విమర్శలు చేయడం లేదు.

Published On November 29, 2011