జగన్‌కు గుడ్‌బై చెప్పే యోచనలో రత్తయ్య, బుజ్జగింపులు

By Srinivas

Published: Tuesday, November 29, 2011, 10:25 [IST]

గుంటూరు: జిల్లాకు చెందిన పార్టీ సీనియర్ నేత మాకినేని పెద రత్తయ్య వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డికి ఝలక్ ఇచ్చే అవకాశాలు కనిపిస్తున్నాయి. ఇటీవల తెలుగుదేశం పార్టీ నుండి వైయస్సార్ కాంగ్రెసు పార్టీలో చేరిన పెద రత్తయ్య ఆ పార్టీకి రాజీనామా చేయాలనే యోచనలో ఉన్నారని సమాచారం. గుంటూరు జిల్లాలో జగన్ ఓదార్పు సమయంలో మరో నేత రావి వెంకటరమణతో జరిగిన గొడవ కారణంగా ఆయన మళ్లీ టిడిపి వైపు చూస్తున్నారు. అయితే మాకినేని పార్టీ మారేందుకు నిర్ణయించుకున్నారని తెలియడంతో వైయస్సార్ కాంగ్రెసు పార్టీ నేతలు బుజ్జగింపుల పర్వం ప్రారంభించారు.

సముచిత ప్రాధాన్యత కల్పిస్తామని పార్టీలోనే కొనసాగాలని వారు ఆయనకు నచ్చజెపుతున్నారట. మాకినేని పెద రత్తయ్య టిడిపిలో ఉండగానే జిల్లాలో ప్రధాన నేతగా ఎదిగారు. మొదటి నుండి టిడిపిలోనే ఉన్న ఆయన ఇటీవలె జగన్ పార్టీలో చేరారు. రత్తయ్య వర్గం కూడా టిడిపిలోకి వెళదామని ఆయనపై ఒత్తిడి చేస్తోందట. దీంతో ఆయన జగన్‌ను వీడి మళ్లీ పాత పార్టీలోకే రావాలనే యోచనలో ఉన్నట్లుగా తెలుస్తోంది.

Published On November 29, 2011