అడ్డంగా దొరికి పోయారు: టిడిపిపై అంబటి రాంబాబు

By Srinivas

Published: Wednesday, November 30, 2011, 9:06 [IST]

హైదరాబాద్: తెలుగుదేశం పార్టీ నేతలు వారు విడుదల చేసిన పత్రాల ద్వారానే అడ్డంగా దొరికి పోయారని వైయస్సార్ కాంగ్రెసు పార్టీ అధికార ప్రతినిధి అంబటి రాంబాబు మంగళవారం మీడియా సమావేశంలో అన్నారు. ఐఎంజి వ్యవహారంలో వారు విడుదల చేసిన పత్రాల్లోనే సాక్ష్యాలు ఉన్నాయని దీనికి ఆ పార్టీ చీఫ్ నారా చంద్రబాబు నాయుడు ఏం సమాధానం చెబుతారని ప్రశ్నించారు. అసలు ఐఎంజి ఒప్పందం కుదిరింది వ్యక్తులతోనా లేక సంస్థతోనా చెప్పాలన్నారు. ఫ్లోరిడాలోని ఐఎంజి ఆకాడమీస్ అధికారి రాశారని మీరే రెండు లేఖలు విడుదల చేశారని వాటిల్లో భారత్ ఐఎంజితో సంబంధాలపై వేరు వేరుగా ఉన్నట్లు మీ లేఖల ద్వారానే స్పష్టమవుతోందన్నారు.

ఈ లేఖలలో ఏది నిజమో మీరే చెప్పాలని ప్రశ్నించారు. అసలు ఫ్లోరిడా అధికారి లేఖ రాసింది వ్యక్తిగత హోదాలోనా లేక కంపెనీ తరఫునా చెప్పాలన్నారు. మీరు ఒప్పందం చేసుకున్నది వ్యక్తులతోనా లేక సంస్థలతోనా చెప్పాలన్నారు. ఎవరో ఉద్యోగులు వ్యక్తిగత ఈ మెయిళ్ల నుంచి లేఖలు పంపిస్తే అవే ఆధారాలు అని ఎలా అంటారని ప్రశ్నించారు. బాబు బూటకాలు చెప్పడానికి ఈ ఒక్క ఆధారం చాలన్నారు. ప్రజలు అంతా గమనిస్తున్నారని, మీ అబద్దాలు సిబిఐ విచారణలో నిగ్గు తేలుతాయన్నారు. మీ బండారం బయటపడుతుందన్నారు.

Published On November 30, 2011