అవిశ్వాసం పెడుతున్నాం: జగన్, కెసిఆర్‌కు బాబు సవాల్

హైదరాబాద్: ప్రజా సమస్యలు తీర్చడంలో విఫలమైనందున కిరణ్ కుమార్ రెడ్డి ప్రభుత్వంపై తాము అవిశ్వాస తీర్మానం పెడుతున్నామని ఇక తమకు మద్దతు ఇస్తారో లేదో తేల్చుకోవాలని వైయస్సార్ కాంగ్రెసు పార్టీ అధ్యక్షుడు వైయస్ జగన్, టిఆర్ఎస్ అధ్యక్షుడు కెసిఆర్‌కు తెలుగుదేశం పార్టీ అధినేత నారా చంద్రబాబు నాయుడు బుధవారం సవాల్ విసిరారు. ప్రజా సమస్యలు పరిష్కరించడంలో ప్రభుత్వం పూర్తిగా విఫలమైనందు వల్ల అవిశ్వాసం తప్ప వేరే మార్గం లేదన్నారు. ప్రభుత్వం కరవు మండలాలను ప్రకటించింది కానీ ఇప్పటి వరకు నిధులు విడుదల చేయలేదన్నారు.

రైతులను ఆదుకోవడంలో పూర్తిగా విఫలమయ్యారని విమర్శించారు. శని, ఆదివారాలు ఇప్పటి వరకు సమావేశాలు నిర్వహించిన దాఖలాలు లేవని, కేవలం అత్యవసర పరిస్థితుల్లోనే వారాంతాల్లో సమావేశాలు ఏర్పాటు చేస్తారని కాని కిరణ్ ప్రభుత్వం కొత్త సంప్రదాయానికి తెరలేపిందన్నారు. రాష్ట్రంలో ప్రస్తుత అనిశ్చిత పరిస్థితికి కాంగ్రెసు పార్టీయే కారణమన్నారు. తెలంగాణపై తమ వైఖరి ఇది వరకే చెప్పామని ఇక నిర్ణయం తీసుకోవాల్సింది కేంద్రంలో, రాష్ట్రంలో అధికారంలో ఉన్న కాంగ్రెసు పార్టీయే అన్నారు. పరిష్కారం చూపించాల్సింది పోయి ఇతరులపై నెట్టడం సరికాదన్నారు. అవిశ్వాసంపై తమకు మద్దతిస్తే తీసుకుంటామని కానీ ఎవరిని సంప్రదించేది లేదన్నారు.

English summary

TDP chief Nara Chandrababu Naidu challenged YSR Congress Party chief YS Jagan and TRS chief KCR on no confidential vote.