సబితకు సిబిఐ క్లీన్ చిట్, శ్రీలక్ష్మి తప్పుడు సమాచారం

By Srinivas

Published: Thursday, December 1, 2011, 15:29 [IST]

హైదరాబాద్: హోంమంత్రి సబితా ఇంద్రా రెడ్డికి సిబిఐ గురువారం క్లీన్ చిట్ ఇచ్చింది. సిబిఐ ప్రత్యేక కోర్టులో గురువారం మధ్యాహ్నం వాద ప్రతివాదనలు గంటన్నర పాటు ఘాటుగా జరిగాయి. ఇరువురి వాదనలు విన్న జడ్జి తీర్పును శుక్రవారానికి వాయిదా వేశారు. ముందుగా శ్రీలక్ష్మి తరఫు న్యాయవాది మాట్లాడారు. తన క్లయింట్ శ్రీలక్ష్మి ఎక్కడా తప్పు చేసిన ఆధారాలు లేవు కాబట్టి ఆమెకు బెయిల్ ఇవ్వాలని కోర్టును కోరారు. ఆమె పారిపోయే అవకాశం లేదు, అలాగే సాక్ష్యాధారాలు నాశనం చేయలేరు కాబట్టి బెయిల్ ఇవ్వాలని విజ్ఞప్తి చేశారు. శ్రీలక్ష్మి ఛార్జ్ తీసుకోకముందే గనుల కేటాయింపులు జరిగాయని తెలిపారు. ప్రభుత్వాదేశాలకు అనుగుణంగానే శ్రీలక్ష్మి కేంద్రానికి సిఫార్సు చేసిందన్నారు. ఆమె ఆరోగ్య కారణాల దృష్ట్యా కూడా బెయిల్ మంజూరు చేయాలని కోరారు. సంబంధిత మంత్రికి తెలియకుండా జివోలు జారీ కావన్నారు. మంత్రులకు తెలియకుండా జరిగాయని చెప్పడం అవాస్తవమన్నారు. జివోలపై శ్రీలక్ష్మి సంతకం కూడా చేయలేదన్నారు.

ఆ తర్వాత సిబిఐ తరఫు న్యాయవాది మాట్లాడారు. శ్రీలక్ష్మి నిందితురాలిగా తమకు బలమైన ఆధారాలు లభించాయని ఆమె గురించి తమకు కొందరు సమాచారమిచ్చారని ఆయితే వారి పేర్లు మాత్రం బయటపెట్టలేమని చెప్పారు. శ్రీలక్ష్మి హెల్త్ సర్టిఫికెట్స్ అన్నీ బోగస్ అని నలభై ఏళ్లు దాటితే సాధారణ ఆరోగ్య సమస్యలు వస్తుంటాయని చెప్పారు. ఆమెకు బెయిల్ ఇస్తే సాక్ష్యాలు తారుమారు చేసే అవకాశముంది కాబట్టి బెయిల్ మంజూరు చేయవద్దని కోరారు. గనులకు సంబంధించి చివరి దశలో ఆము అనుమతులు ఇచ్చారని ఆరోపించారు. జీవో విడుదలలో శ్రీలక్ష్మిదే కీలక పాత్ర అన్నారు.

గనుల కేటాయింపులో సంబంధిత మంత్రికి పూర్తి సమాచారమివ్వలేదని చెప్పారు. శ్రీలక్ష్మి ఏకపక్షంగా వ్యవహరించి కేటాయింపులు జరిపారన్నారు. వీటిలో మంత్రి ప్రమేయం లేదని అభిప్రాయపడ్డారు. కొందరికి మేలు చేసేందుకే శ్రీలక్ష్మి కేటాయింపులలో అత్యుత్సాహం ప్రదర్శించారని, కార్యదర్శి హోదాలోనే గనుల కేటాయింపు జరిగిందన్నారు. ఉద్దేశ్య పూర్వకంగా మంత్రిపై ఆరోపణలు చేస్తున్నారని మంత్రి స్థాయిలో కేటాయింపులు జరగవని చెప్పారు. మంత్రులను గైడ్ చేయాల్సిన బాధ్యత అధికారులదేనని చెప్పారు. శ్రీలక్ష్మి తమకు విచారణలో కూడా ఎప్పుడూ సహకరించలేదని ఎప్పుడూ ఏడుస్తూనే ఉండేవారన్నారు.

Published On December 1, 2011