టిడిపి బెస్ట్ అపొజిషన్: కిరణ్ కుమార్ రెడ్డి జోక్

By Pratap

Published: Thursday, December 1, 2011, 16:14 [IST]

హైదరాబాద్: ముఖ్యమంత్రి కిరణ్ కుమార్ రెడ్డి తెలుగుదేశం పార్టీపై వ్యంగ్యాస్త్రాలు విసిరారు. తెలుగుదేశం ఉత్తమ ప్రతిపక్షంగా వ్యవహరిస్తోందని, అందువల్ల ఆ పార్టీ ఎప్పుడూ ప్రతిపక్షంలోనే ఉండాలని ఆయన అన్నారు. తెలుగుదేశం మంచి ప్రతిపక్షంగా ఉంటుందని, ఎల్ల వేళలా ప్రతిపక్షంలో ఉండాలని తాను శానససభలో చెప్పానని, ఇప్పుడు అవే మాటలు శాసనమండలిలో చెబుతున్నానని ఆయన అన్నారు. తెలుగుదేశం ఎమ్మెల్సీ దాడి వీరభద్రరావుకు మాటకు మాట ఇస్తూ గురువారం శాసనమండలిలో ఆయన ఆ వ్యంగ్యాస్త్రాలు విసిరారు. ఏదో అలవాటుగా తెలుగుదేశం నాయకులు ధర్నాకు కూర్చున్నారని, మర్నాడే కేంద్రం రుణమాఫీ నిర్ణయం తీసుకుందని, అది తమ ధర్నా వల్లనే జరిగిందని చెప్పుకున్నారని, అందుకే తెలుగుదేశం ప్రతిపక్షంగా బాగా పనిచేస్తుందని చెప్పానని ఆయన అన్నారు.

ముఖ్యమంత్రి వ్యాఖ్యలకు దాడి వీరభద్రరావు ఘాటుగా ప్రతిస్పందించారు. అధికారం ఎవరికీ శాశ్వతం కాదని, ఇంతకు ముందు తాము అక్కడ ఉన్నామని, ఇప్పుడు ఇక్కడికి వచ్చామని, రేపు మీరు ఇక్కడికి (ప్రతిపక్షంలోకి) వచ్చి, మేము అక్కడికి (అధికారంలోకి) రావచ్చునని ఆయన అన్నారు. శానససభ సమావేశం రేపటికి వాయిదా పడిన తర్వాత ముఖ్యమంత్రి శాసన మండలి సమావేశాల్లో పాల్గొన్నారు.

Published On December 1, 2011