డే ఫోటోను రాజన్‌కు ఇవ్వలేదు: మహిళా జర్నలిస్టు

By Pratap

Published: Friday, December 2, 2011, 17:53 [IST]

ముంబై: హత్యకు గురైన సీనియర్ జర్నలిస్టు జె డే ఫొటోను తాను ఛోటా రాజన్‌కు ఇవ్వలేదని ఈ కేసులో అరెస్టయిన మహిళా జర్నలిస్టు జిగ్నా వోరా చెప్పింది. డే గురించి తాను చెడుగా మాట్లాడిన విషయం నిజమేనని, అయితే తాను చోటా రాజన్‌కు డే ఫొటోను, చిరునామాను, ఇతర వివరాలను ఇవ్వలేదని చెప్పింది. విచారణ అవసరం కాబట్టి ఈ నెల 5వ తేదీ వరకు వోరాను పోలీసు కస్టడీకి అప్పగిస్తున్నట్లు ప్రత్యేక మోకా కోర్టు న్యాయమూర్తి ఎస్ఎం మోడక్ చెప్పారు. వొరా అయితే పాలీగ్రాఫ్ టెస్టుకు, బ్రెయిన్ మ్యాపింగ్‌కు ప్రాసిక్యూషన్ కోరిన అనుమతిని కోర్టు నిరాకరించింది. జిగ్నా వొరా అందుకు అంగీకరించకపోవడంతో కోర్టు అనుమతి ఇవ్వలేదు.

పరిణామాలను తెలుసుకోలేక డే గురించి తాను చెడుగా మాట్లాడినట్లు వోరా పాక్షికంగా అంగీకరించింది. డే గురించి సమాచారం ఇచ్చినట్లు వచ్చిన ఆరోపణలను మాత్రం ఖండించింది. ఆమె చాలా సమాచారాన్ని దాస్తోందని ఓ సీనియర్ పోలీసు అధికారి అన్నారు. డే హత్య కేసులో మహిళా జర్నలిస్టు జిగ్నా వొరాను పోలీసులు ఇటీవల అరెస్టు చేసిన విషయం తెలిసిందే.

Published On December 2, 2011