బిజెపికి దెబ్బ, గాలి అనుచరుడు శ్రీరాములు విజయం

By Srinivas

Published: Sunday, December 4, 2011, 11:19 [IST]

బెంగళూరు: కర్నాటక ఉప ఎన్నికల్లో భారతీయ జనతా పార్టీకి ఎదురు దెబ్బ తగిలింది. బళ్లారి ఉప ఎన్నికల్లో మైనింగ్ రారాజు గాలి జనార్ధన్ రెడ్డి అనుచరుడు, స్వతంత్ర అభ్యర్థి శ్రీరాములు ఘన విజయం సాధించారు. ఆయన తన సమీప కాంగ్రెసు పార్టీ అభ్యర్థి రాంప్రసాద్‌పై 46వేల పై చిలుకు ఓట్ల భారీ మెజార్టీతో గెలుపొందారు. ఈ ఎన్నికల్లో బిజెపి గట్టి దెబ్బ తగిలింది. ఆ పార్టీ తరఫున పోటీ చేసిన గాది లింగప్ప కనీసం డిపాజిట్ కూడా దక్కించుకోలేక పోయారు. ఎంతో ప్రతిష్టాత్మకంగా తీసుకున్న ఎన్నికల్లో ఓడిపోవడంతో బిజెపి శ్రేణుల్లో నిరుత్సాహం కనిపిస్తోంది.

కాగా మాజీ మంత్రి శ్రీరాములు రాజీనామాతో నవంబర్ 30వ తేదిన ఉప ఎన్నికలు జరిగాయి. శ్రీరాములు గెలుపుతో ఆయన అనుచురులు, అభిమానులు సంబరాల్లో మునిగి పోయారు. ఈ ఎన్నికల కోసం మాజీ ముఖ్యమంత్రి యడ్యూరప్ప స్వయంగా రంగంలోకి దిగారు. గాది లింగప్పకు అనుకూలంగా ప్రచారం చేశారు. గాలిపై విరుచుకు పడ్డారు. అయినా బిజెపి కనీసం డిపాజిట్ కూడా దక్కించుకోలేక పోయింది.

Published On December 4, 2011