ఖబర్దార్ కెటిఆర్!: పోలవరం సవాల్‌ను స్వీకరించిన టిడిపి

By Srinivas

Published: Monday, December 5, 2011, 13:38 [IST]

హైదరాబాద్: పోలవరం టెండర్లలో జరిగిన అక్రమాలను నిరూపించేందుకు తాము సిద్ధంగా ఉన్నామని తెలుగుదేశం పార్టీ శాసనసభ్యులు ఎల్ రమణ్, సీతక్క, తుమ్మల నాగేశ్వర రావు సోమవారం మీడియా పాయింట్ వద్ద టిఆర్ఎస్ ఎమ్మెల్యే కె తారక రామారావు ప్రతి సవాల్ విసిరారు. తెలంగాణ సకల జనుల సమ్మెను టిఆర్ఎస్ అధ్యక్షుడు కల్వకుంట్ల చంద్రశేఖర రావు పోలవరం టెండర్ల కోసం నిర్వీర్యం చేశారని వారు ఆరోపించారు. టెండర్లలో అక్రమాలు నిరూపించేందుకు తాము ఎప్పుడూ సిద్ధంగానే ఉన్నామని టిఆర్ఎస్సే అందుకు చర్చకు రావడం లేదని విమర్శించారు. నీ అయ్య కెసిఆర్ టిడిపిలో పదవులు అనుభవించి వెళ్లారని ఆ విషయం కెటిఆర్ తెలుసుకోవాలని గుర్తు చేశారు.

తప్పు చేయకుంటే నిరూపించుకోవాలి కానీ ఎదురుదాడికి దిగడమేమిటని కెటిఆర్‌ను ప్రశ్నించారు. పోలవరం కోసం ప్రభుత్వంతో లాలూచీ పడింది వాస్తవమన్నారు. టిడిపి ఎమ్మెల్యేలను, టిడిపిని విమర్శిస్తే బాగుండదని వారు కెటిఆర్‌ను హెచ్చరించారు. మీ పలుకుబడి కోసమే తెలంగాణ పేరుతో కార్యక్రమాలు చేపడుతున్నారని విమర్శించారు. పోలవరంపై మా వైఖరి స్పష్టంగా ఉందని తుమ్మల చెప్పారు. పోలవరం టెండర్ల వాస్తవాలను స్పీకర్ వద్ద నిరూపిస్తామని చెప్పారు.

Published On December 5, 2011