వైయస్‌కిచ్చిన బహుమతి ఇదేనా?: విజయమ్మ ఆవేదన

By Srinivas

Published: Monday, December 5, 2011, 20:25 [IST]

హైదరాబాద్: తమను పార్టీని బయటకు పంపించడమే కాంగ్రెసు పార్టీ దివంగత ముఖ్యమంత్రి వైయస్ రాజశేఖర రెడ్డికి ఇచ్చిన బహుమతా? అని వైయస్సార్ కాంగ్రెసు పార్టీ గౌరవ అధ్యక్షురాలు వైయస్ విజయమ్మ సోమవారం అసెంబ్లీలో ప్రశ్నించారు. విధిలేని పరిస్థితిల్లో తాను ఇక్కడకొచ్చి మాట్లాడుతున్నానని, వైయస్ అధికారంలోకి తెచ్చిన ప్రభుత్వంపై అవిశ్వాసం పెట్టడం బాధగానే ఉన్నదన్నారు. టిడిపి అధినేత నారా చంద్రబాబు నాయుడు వైయస్‌పై ఆరోపణలు చేస్తున్నారని ఆయన అధికారంలో ఉన్నప్పుడు చేస్తే మంచి ఇతరులు చేస్తే చెడా అని ప్రశ్నించారు. పచ్చకామెర్లు ఉన్న వారికి లోకమంతా పచ్చగా కనిపిస్తున్నట్టు బాబు తీరు ఉందన్నారు. అధికార ప్రతిపక్షాలు రెండూ దివంగత వైయస్‌ను తలుచుకుంటున్నాయన్నారు. అవిశ్వాసం పెట్టింది వైయస్ మీదా లేక రైతుల మీదా అర్థం కావడం లేదన్నారు.

చంద్రబాబు వైయస్‌ను విమర్శిస్తుంటే అధికార పక్షం మాట్లాడక పోవడం బాధాకరమని, వైయస్ నిరంతరం కృషి చేసి కాంగ్రెసును అధికారంలోకి తీసుకు వచ్చారన్నారు. వైయస్ అసెంబ్లీలో మాట్లాడుతుంటే తాను టీవీల్లో చూసేదాన్నని ఆవేదనగా చెప్పారు. ఇది చాలా దురదృష్టకరమైన రోజని అన్నారు. అవిశ్వాసం ఎవరు పెట్టినా మద్దతిస్తామన్న జగన్ మాట ప్రకారమే టిడిపికి అండగా నిలబడుతున్నామన్నారు. అవిశ్వాసం ఎవరు పెట్టారన్నది తమకు ముఖ్యం కాదన్నారు. రైతులకు ప్రభుత్వం ఏమీ చేయలేక పోతోందని విమర్శించారు. వైయస్ ఉన్నప్పుడు రైతులకు భరోసా ఉండేదని కాని ఇప్పుడు మాత్రం ఆ పరిస్థితి లేదన్నారు. వైయస్ మృతిని తట్టుకోలేక చనిపోయిన వారిని ప్రభుత్వం ఇప్పటి వరకు పరామర్శించిందా అన్నారు. వైయస్ కాంగ్రెసును రెండు సార్లు గెలిపించారని కానీ ఆయన మృతి తర్వాత కాంగ్రెసు ఆయనకు ఏం బహుమతి ఇచ్చిందని ప్రశ్నించారు.

అధికార, ప్రతిపక్ష పార్టీలు ఓ వర్గం మీడియాతో కలిసి వైయస్‌పై కుట్ర చేస్తున్నాయన్నారు. జగన్‌కు కాంగ్రెసు పొమ్మన లేక పొగపెట్టిందన్నారు. అధికారం కోసమే తాము ప్రయత్నించినట్లుగా చిత్రీకరిస్తున్నారన్నారు. తమను బయటకు పంపడమే కాంగ్రెసు వైయస్‌కు ఇచ్చిన బహుమతా? అని ప్రశ్నించారు. వైయస్ ప్రవేశ పెట్టిన పథకాలను ప్రభుత్వం పూర్తిగా నీరుగారుస్తుందని విమర్శించారు. టిడిపి, వైయస్సార్ కాంగ్రెసు కుమ్మక్కైందని ఎవరు విమర్శలు చేసినప్పటికీ వైయస్ ఆశయాలు నీరుగారుస్తున్న కాంగ్రెసు ప్రభుత్వానికి వ్యతిరేకంగా వైయస్‌ను అభిమానించే ఎమ్మెల్యేలు ఓటు వేయాలని సూచించారు.

Published On December 5, 2011