బాబుతో జగన్ కుమ్మక్కు, వారిపై వేటు వేయాలి: విహెచ్

By Srinivas

Published: Tuesday, December 6, 2011, 15:33 [IST]

న్యూఢిల్లీ: దివంగత ముఖ్యమంత్రి వైయస్ రాజశేఖర రెడ్డిని విమర్శించిన చంద్రబాబు నాయుడుతో వైయస్సార్ కాంగ్రెసు పార్టీ అధ్యక్షుడు, కడప ఎంపీ వైయస్ జగన్మోహన్ రెడ్డి చేతులు కలిపారని కాంగ్రెసు సీనియర్ నేత వి హనుమంత రావు మంగళవారం అన్నారు. నిన్నటి అవిశ్వాసంతో ఎవరు ఎవరితో కుమ్మక్కయ్యారో తేలిపోయిందన్నారు. జగన్ తండ్రి ఆశయాలు ఎలా నెరవేరుస్తారో ప్రజలు అర్థం చేసుకోవాలన్నారు. విప్ ధిక్కరించి ఓటు వేసిన జగన్ ఎమ్మెల్యేలపై వేటు వేయాల్సిందేనన్నారు. ఇన్నాళ్లు పార్టీని విమర్శించినా ఓపిక పట్టామని ఇక ఊరుకోవద్దన్నారు. వారిపై ఏదో ఒకటి తేల్చవలసిందేనని చెప్పారు.

ప్రభుత్వాన్ని పడగొట్టాలని చూసినప్పుడు ఊరుకోవద్దన్నారు. వారిపై వేటు వేసినా వచ్చే ఉప ఎన్నికల్లో కాంగ్రెసు పార్టీయే అత్యధిక మెజార్టీతో గెలుస్తుందన్నారు. ప్రస్తుత ప్రభుత్వాలన్నీ దాదాపు ఇతర పార్లీలతో కలిసే కొనసాగుతున్నాయన్నారు. ప్రభుత్వానికి మద్దతిచ్చిన చిరంజీవి వర్గం ఎమ్మెల్యేలు అభివృద్ధి పనులు చేయించుకోవడంలో తప్పేముందన్నారు.

Published On December 6, 2011