సబిత, ఇతర మంత్రులపై కేసుకు కోర్టులో పిటిషన్

By Pratap

Published: Wednesday, December 7, 2011, 14:31 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి ఆస్తుల కేసులో మంత్రులపై, అధికారులపై విచారణ జరిపించాలని, వారిపై కేసు నమోదు చేయాలని కోరుతూ సుధాకర్ రెడ్డి అనే న్యాయవాది నాంపల్లి కోర్టులో పిటిషన్ దాఖలు చేశారు. వైయస్ జగన్ ఆస్తుల కేసులో మంత్రులను, ఐఎఎస్ అధికారులను వదిలేశారని ఆయన బుధవారం కోర్టుకు ఫిర్యాదు చేశారు. వీరిపై కేసు నమోదు చేసి, విచారిస్తే మరిన్ని విషయాలు వెలుగులోకి వచ్చే అవకాశం ఉందని ఆయన అన్నారు. మంత్రులు సబితా ఇంద్రారెడ్డి, ధర్మాన ప్రసాదరావు, మోపిదేవి వెంకటరమణ, గీతారెడ్డి, పొన్నాల లక్ష్మయ్య, కన్నా లక్ష్మినారాయణలపై, అధికారులు పివిఎస్‌కె శర్మ, ఎస్వీ ప్రసాద్, శామ్యూల్, ఆదిత్యనాథ్ దాస్, రత్నప్రభ, మన్మోహన్ సింగ్, శ్రీలక్ష్మి, శ్యాంబాబులపై కేసులు నమోదు చేయాలని ఆయన కోరారు.

కాగా, వైయస్ జగన్ ఆస్తుల కేసులో రెవెన్యూ అధికారులు బుధవారం సిబిఐ అధికారుల ముందు హాజరయ్యారు. ఇదే కేసులో సిబిఐ తన పరిధి దాటి దర్యాప్తు కొనసాగిస్తోందని జగతి పబ్లికేషన్స్ వైస్ చైర్మన్ విజయసాయి రెడ్డి వేసిన పిటిషన్‌పై విచారణ గురువారానికి వాయిదా పడింది. వైయస్ జగన్ ఆస్తుల కేసులో సాక్షులను సిబిఐ వేధిస్తోందని ఆరోపిస్తూ విజయసాయి రెడ్డి పిటిషన్ దాఖలు చేశారు.

Published On December 7, 2011