సిఎంను మార్చాలని శంకరరావు పేరుతో లేఖ, ఖండన

By Srinivas

Published: Monday, December 12, 2011, 18:36 [IST]

హైదరాబాద్: ముఖ్యమంత్రి కిరణ్ కుమార్ రెడ్డిని మార్చాలంటూ చేనేత, జౌళీ శాఖ మంత్రి శంకర రావు పేరుతో ఏఐసిసి అధ్యక్షురాలు సోనియా గాంధీకి లేఖ వెళ్ళింది. అయితే తాను ఆ లేఖను పంపించలేదని శంకర రావు విలేకరుల సమావేశం పెట్టి మరీ సోమవారం ఖండించారు. ఆ సంతకం తనది కాదని కావాలంటే చూసుకోవచ్చునని అన్నారు. ఆ లేఖపై సిఎం వెంటనే విచారణ జరిపించాలన్నారు. అనవసరంగా నా పేరుతో ఎవరో లేఖ రాయడం ఏమిటని ప్రశ్నించారు. ఈ రోజే తన పెళ్లి రోజని, అది తానే రాసినట్లయితే వచ్చే పెళ్లి రోజు నాటికి నేను బతికుండనన్నారు.

గతంలో తాను కొందరు మంత్రులపై ఫిర్యాదు చేశానని, ఇందులో వారి హస్తం ఉండి ఉండవచ్చునని ఆయన అనుమానం వ్యక్తం చేశారు. అవినీతిపై పోరాడుతున్నందుకే తనపై ఇలా చేసి ఉంటారన్నారు. తాను ఎవరి తాటాకు చప్పుళ్లకు బెదిరేది లేదన్నారు. సోనియాకు తాను ఎలాంటి లేఖను రాయలేదన్నారు. నా లెటర్ హెడ్‌ను ఎవరో ఫోర్జరీ చేశారన్నారు.

Published On December 12, 2011