విలీనానికి మేం అడ్డుపడలేదు: రాఘవులు ఆగ్రహం

By Srinivas

Published: Monday, December 12, 2011, 12:49 [IST]

హైదరాబాద్: సిపిఐ, సిపిఎంల విలీనానికి తాము అడ్డుపడ్డామన్న వ్యాఖ్యల్లో ఎలాంటి నిజం లేదని అది పూర్తిగా అవాస్తవమని సిపిఎం రాష్ట్ర కార్యదర్శి రాఘవులు సోమవారం అన్నారు. సిపిఐ రాష్ట్ర కార్యదర్శి నారాయణ వ్యాఖ్యలపై ఆయన మండిపడ్డారు. తమకు కులాలు, గోత్రాలు లేవన్నారు. అభిప్రాయాలు ఒకటైతే కలిసి పోవచ్చునని చెప్పారు. తమది బాధ్యతారాహిత్యమని నారాయణ అనడం సరికాదన్నారు. అసలు బాధ్యతారాహిత్యం ఎవరితో తెలుసుకోవాలని సూచించారు.

విలీనంపై సిపిఐ అభిప్రాయాలు చెబితే కలిసిపోయే దానిపై తాము చర్చిస్తామన్నారు. రెండు పార్టీల విలీనం అంత సులువు కాదని బర్దనే చెప్పారని గుర్తు చేశారు. అలాంటిది తాము విలీనానికి అడ్డుపడ్డామనడం సరికాదన్నారు. కాగా అంతకుముందు రాఘవులుకు పోరాటాల కన్నా కులమతాలే ఎక్కువ అని, ఆయన బాధ్యతారాహిత్యంగా వ్యవహరిస్తున్నారని నారాయణ విమర్శించారు.

Published On December 12, 2011