ఎమ్మెల్యేలపై వేటు జగన్, కాంగ్రెసు డ్రామా: టిడిపి ఫైర్

హైదరాబాద్: వైయస్సార్ కాంగ్రెసు పార్టీ అధ్యక్షుడు, కడప ఎంపీ వైయస్ జగన్మోహన్ రెడ్డి వర్గం ఎమ్మెల్యేలపై కాంగ్రెసు పార్టీ వేటు ఓ డ్రామా అని టిడిపి నేత గాలి ముద్దుకృష్ణమ నాయుడు బుధవారం విమర్శించారు. వచ్చే ఉప ఎన్నికలు కాంగ్రెసు పార్టీకి ఉరితాళ్లు అవుతాయన్నారు. ప్రస్తుతం ఎన్నికలంటేనే కాంగ్రెసు భయపడుతోందని విమర్శించారు. జగన్, కాంగ్రెసుకు మధ్య మ్యాచ్ ఫిక్సింగ్ ఉందన్నారు. పురుగులు పట్టిన బియ్యం ఒక రూపాయికి కిలో ఇస్తే పేదవారి కడుపు నిండుతుందా అని ప్రశ్నించారు. డిసెంబర్ నెలలో విద్యుత్ కోత ఇప్పుడే చూస్తున్నామన్నారు. రాష్ట్రంలో, కేంద్రంలో అధికారంలో ఉన్న కాంగ్రెసు స్వయంగా నిర్ణయం తీసుకునే పరిస్థితిలో లేదన్నారు.

ఉప ఎన్నికలను ఎదుర్కోలేక కాంగ్రెసు ఈ ఎన్నికలు రిఫరెండం కాదంటోందన్నారు. జగన్, కాంగ్రెసు మధ్య ఓట్లు చీలి అంతిమంగా టిడిపికి లబ్ధి చేకూరుతుందన్నారు. ఎన్నికల భయంతోనే స్థానిక సంస్థల ఎన్నికలు నిర్వహించలేక పోతుందన్నారు. కెవిపి కొడుకు నిర్వాకం వల్లే కెటిపిఎస్, విటిపిఎస్ నుంచి వెయ్యి మెగావాట్ల విద్యుత్ ఉత్పత్తిని నష్టపోయామన్నారు.

English summary

Gali Muddukrishma Naidu lashes out at Congress and YS Jagan.