లక్ష కోట్లు సంపాదించాడు: జగన్‌పై నామా పరోక్ష వ్యాఖ్య

By Srinivas

Published: Wednesday, December 14, 2011, 17:23 [IST]

హైదరాబాద్: అవినీతితో ఓ వ్యక్తి ఆంధ్ర ప్రదేశ్‌లో అనతికాలంలోనే లక్ష కోట్లు సంపాదించారని తెలుగుదేశం పార్టీ సీనియర్ పార్లమెంటు సభ్యుడు నామా నాగేశ్వర రావు బుధవారం లోక్‌సభలో పరోక్షంగా వైయస్సార్ కాంగ్రెసు పార్టీ అధ్యక్షుడు, కడప ఎంపీ వైయస్ జగన్మోహన్ రెడ్డిని ప్రస్తావించారు. అందుకు సంబంధించిన ఆధారాలు ఉన్నాయంటూ సభలో గతంలో టిడిపి వేసిన రాజా ఆఫ్ కరప్షన్ పుస్తకాన్ని ప్రదర్శించారు. మైనింగ్ మాఫియా జాతికే నష్టమని నాడు లోక్‌సభలో చెప్పినా పట్టించుకోలేదని ఇప్పుడు అదే నిజమైందన్నారు.

జిడిపితో సమానంగా భారత దేశం వెలుపల నల్లధనం ఉందని అన్నారు. దేశంలో లక్షలాది, కోట్లాది మంది తినడానికి తిండి లేక, తాగడానికి నీరులేక బాధపడుతున్నారని కానీ కొందరు మాత్రం అక్రమంగా కోట్లాది రూపాయలు వెనుకేసుకుంటున్నారన్నారు. నల్లధనాన్ని జాతీయం చేయాలని ఆయన డిమాండ్ చేశారు.

Published On December 14, 2011