సభ బహిష్కరణ: చంద్రబాబుకు గ్రామస్థులు ఝలక్

నిజామాబాద్: తెలుగుదేశం పార్టీ అధినేత నారా చంద్రబాబు నాయుడు నిజామాబాద్ జిల్లాలో అడుగు పెట్టకముందే జిల్లాకు చెందిన జక్రాన్ పల్లి గ్రామస్థులు ఝలక్ ఇచ్చారు. గురువారం బాబు నిజామాబాద్ జిల్లాలో రైతు పోరుబాట చేపట్టనున్నారు. ఇది తెలిసిన జక్రాన్ పల్లి గ్రామాభివృద్ధి కమిటీ బాబు పాల్గొనే బహిరంగ సభను బహిష్కరించి నిరసన తెలపాలని నిర్ణయించింది. ఈ విషయాన్ని గ్రామస్థులందరికీ తెలియజేశారు. బాబు ఉదయం ఆర్మూర్ గోవింద్ పేట నుండి యాత్ర ప్రారంభించనున్నారు. జక్రాన్ పల్లి మండలం కొలిప్యాక్ మీదుగా పంటలను పరిశీలిస్తారు.

పాదయాత్ర అనంతరం మండల కేంద్రంలో బహిరంగ సభలో పాల్గొంటారు. తెలంగాణ ఉద్యమంలో క్రియాశీలకంగా పాల్గొన్న జక్రాన్ పల్లి గ్రామస్థులు బాబు తెలంగాణపై స్పష్టమైన వైఖరి ప్రకటించకుండా రెండు కళ్ల సిద్ధాంతం ప్రవచించినందునే బహిష్కరిస్తున్నారు. తెలంగాణపై బాబు తన వైఖరి చెబితేనే స్వాగతిస్తామని అంటున్నారు. అంతేకాదు గ్రామంలో తెలంగాణ రాష్ట్ర ఏర్పాటు కోరుతూ భారీ ర్యాలీని కూడా నిర్వహించాలని నిర్ణయించారు.

English summary

Jakranpally of Nizamabad district people decided to boycott Chandrababu Naidu public meeting.