ఉప ఎన్నికల్లో తెలుగుదేశం ట్రంప్ కార్డు బాలయ్య

By Pratap

Published: Friday, December 16, 2011, 19:58 [IST]

హైదరాబాద్: రాష్ట్రంలో వచ్చే ఉప ఎన్నికల్లో తెలుగుదేశం పార్టీ అధ్యక్షుడు నారా చంద్రబాబు నాయుడు తన బావమరిది, సినీ హీరో బాలకృష్ణను ట్రంప్ కార్డుగా వాడబోతున్నారు. ఉప ఎన్నికలను చంద్రబాబు నాయుడు ప్రతిష్టాత్మకంగా తీసుకుంటున్నారు. పార్టీ పరిస్థితి ఏ మాత్రం బాగా లేదని ప్రచారం జరుగుతున్న నేపథ్యంలో ఉప ఎన్నికల్లో సత్తా చాటి, దాన్ని తిప్పికొట్టాలనే ఉద్దేశంతో చంద్రబాబు ఉన్నారు. దాంతో బాలకృష్ణను రంగంలోకి దింపాలని అనుకుంటున్నారు. బాలకృష్ణ ఉప ఎన్నికల ప్రచారంలో పెద్ద యెత్తున పాల్గొనే అవకాశాలున్నట్లు చెబుతున్నారు. శ్రీరామరాజ్యం విజయవంతమైన నేపథ్యంలో బాలకృష్ణ ఇమేజ్ మరింత పెరిగిందని అభిప్రాయపడుతున్నారు.

రాష్ట్రంలోని దాదాపు 26 శాసనసభ స్థానాలకు ఉప ఎన్నికలు జరిగే అవకాశాలున్నాయి. ఇది మినీ సాధారణ ఎన్నికల సమరాన్ని తలపించే అవకాశాలున్నాయి. తెలుగుదేశం, కాంగ్రెసు పార్టీలను తీవ్రంగా దెబ్బ తీయాలనే ఉద్దేశంతో వైయస్సార్ కాంగ్రెసు పార్టీ అధ్యక్షుడు వైయస్ జగన్, తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు ఉన్నారు. దీంతో ఈ రెండు పార్టీలను దెబ్బ తీస్తూ కాంగ్రెసు పార్టీని ఎదుర్కోవడానికి బాలకృష్ణ ప్రచారం అవసరమని చంద్రబాబు భావిస్తున్నట్లు తెలుస్తోంది.

బాలకృష్ణ ప్రకాశం, నెల్లూరు, కడప, అనంతపురం జిల్లాల్లోని శాసనసభ స్థానాలకు జరిగే ఉప ఎన్నికల్లో తెలుగుదేశం అభ్యర్థుల తరఫున ప్రచారం చేయనున్నారు. తెలంగాణలో బాలకృష్ణ ప్రచారం ఉంటుందా, లేదా అనేది తెలియదు. సీమాంధ్రలో మాత్రం బాలయ్యను పార్టీ ప్రచారం కోసం విస్తృతంగా వాడుకోవాలనే ఉద్దేశంతో చంద్రబాబు ఉన్నారు.

Published On December 16, 2011