టిడిపి, జగన్ పార్టీలూ సర్వే చేస్తున్నాయి: మేకపాటి

హైదరాబాద్: వైయస్సార్ కాంగ్రెసు పార్టీ అధ్యక్షుడు, కడప ఎంపీ వైయస్ జగన్మోహన్ రెడ్డి వర్గం ఎమ్మెల్యేల నియోజకవర్గాల్లో ఉప ఎన్నికలు జరగబోతున్న నేపథ్యంలో కాంగ్రెసు, తెలుగుదేశం పార్టీలు ఫలితాలు ఎలా ఉంటాయో తెలుసుకునేందుకు సర్వేలు చేస్తున్నాయని శ్రీ పొట్టి శ్రీరాములు నెల్లూరు జిల్లా పార్లమెంటు సభ్యులు మేకపాటి రాజమోహన్ రెడ్డి శుక్రవారం అన్నారు. వైయస్సార్ కాంగ్రెసు కూడా సర్వే చేస్తోందని, ఫలితాలు ఎలా ఉంటాయో అందరికీ తెలుసునని అయినప్పటికీ టిడిపి, కాంగ్రెసులు మేకపోతు గాంభీర్యం ప్రదర్శిస్తున్నాయని విమర్శించారు. జగన్ పార్టీ అన్ని నియోజకవర్గాల్లో గెలుపొందడం ఖాయమని అయితే మెజార్టీ ఎంత అన్నదే ఇక్కడ అసలు విషయమన్నారు. కడప, పులివెందుల ఫలితాలు తప్పకుండా పునరావృతమవుతాయన్నారు.

కాగా ఈ నెల 21న వైయస్ జగన్మోహన్ రెడ్డి పుట్టిన రోజు సందర్భంగా వైయస్సార్ కాంగ్రెసు పార్టీ హైదరాబాదులో ఉచిత మల్టీస్పెషాలిటీ హెల్త్ క్యాంప్‌కు ఏర్పాట్లు చేస్తోంది. ఇందుకు సంబంధించిన పోస్టర్‌ను మేకపాటి ఆవిష్కరించారు. ఈ సందర్భంగా ఆయన మాట్లాడారు. ఈ కార్యక్రమంలో మాజీ మంత్రి బాలినేని శ్రీనివాస్ రెడ్డి తదితరులు పాల్గొన్నారు. కాగా ఈ హెల్త్ క్యాంప్ యూసఫ్ గూడ ఫంక్షన్ హాల్‌లో జరగనుంది.

English summary

MP Mekapati Rajamohan Reddy confident on by poll, YSR Congress Party easily win.