అసలు సినిమా ముందుంది: నితిన్ గడ్కరీ హెచ్చరిక

By Srinivas

Published: Friday, December 16, 2011, 16:42 [IST]

హైదరాబాద్: మూడు రోజుల పాటు హైదరాబాదులో సాగిన మురళీధర రావు నిరాహార దీక్ష కేవలం ఓ ట్రయలర్ మాత్రమేనని అసలు సినిమా ముందుందని భారతీయ జనతా పార్టీ జాతీయ అధ్యక్షుడు నితిన్ గడ్కరీ అన్నారు. శుక్రవారం మురళీధర రావు దీక్షను ఆయన విరమింప చేశారు. ఈ సందర్భంగా ఆయన మాట్లాడారు. హైదరాబాద్ నుండి ఢిల్లీ వరకు కాంగ్రెసు అక్రమాలకు పాల్పడుతోందని విమర్శించారు. 2జి కుంభకోణంలో జైలులో ఉన్న రాజాతో పాటు చిదంబరం కూడా తీహార్ జైలులో ఉండాల్సిన వ్యక్తి అని ధ్వజమెత్తారు.

ప్రజా వ్యతిరేక పాలన సాగిస్తున్న కాంగ్రెసును విడిచిపెట్టే ప్రసక్తి లేదన్నారు. కులవృత్తులన్నింటిపై బిజెపి అవిశ్రాంతంగా పోరాటం చేస్తుందన్నారు. చేనేత కార్మికుల సమస్యలపై పార్లమెంటులో లేవనెత్తడమే కాకుండా, దేశవ్యాప్తంగా కార్మికులతో ఓ భారీ కార్యక్రమాన్ని నిర్వహిస్తామన్నారు. కాగా బిజెపి జాతీయ ప్రధాన కార్యదర్శి అయిన మురళీధర రావు చేనేత సంక్షోభ నివారణకై ఇందిరాపార్కు వద్ద మూడు రోజులపాటు నిరాహార దీక్ష చేశారు.

Published On December 16, 2011