ఇప్పటి రాజకీయాలకు చంద్రబాబు వేస్ట్: నాగం

By Pratap

Published: Saturday, December 17, 2011, 17:12 [IST]

హైదరాబాద్: ఇప్పటి రాజకీయాలకు తెలుగుదేశం పార్టీ అధ్యక్షుడు నారా చంద్రబాబు నాయుడు పనికి రారని తెలంగాణ నగారా సమితి నాయకుడు నాగం జనార్దన్ రెడ్డి అన్నారు. పదిహేడేళ్ల పాటు తెలంగాణ ప్రజలు అండగా ఉండి నిలబెట్టిన తెలుగుదేశం పార్టీని చంద్రబాబు భ్రష్టు పట్టించారని ఆయన వ్యాఖ్యానించారు. రైతు పోరు బాట పేరుతో చంద్రబాబు తెలంగాణను మోసం చేస్తున్నారని ఆయన శనివారం మీడియా ప్రతినిధులతో అన్నారు. తెలంగాణలోని ఆత్మహత్యలకు చంద్రబాబే కారణమని ఆయన విమర్శించారు. 2009 ఎన్నికల్లో తెలుగుదేశం పార్టీ 53 సీట్లకు పోటీ చేస్తే 39 సీట్లు గెలుచుకుందని, సీమాంధ్రలో 170 సీట్లకు పోటీ చేసి కేవలం 53 సీట్లు గెలుచుకుందని ఆయన అన్నారు.

నాగం జనార్దన్ రెడ్డి తన శాసనసభా సభ్యత్వానికి, పార్టీకి రాజీనామా చేసిన విషయం తెలిసిందే. తెలంగాణపై చంద్రబాబు వైఖరితో విసిగిపోయి ఆయన బయటకు వచ్చారు. ఆయన రాజీనామా వల్ల మహబూబ్‌నగర్ జిల్లాలోని నాగర్‌కర్నూలు శానససభా స్థానానికి ఉప ఎన్నిక జరుగుతుంది. నాగం జనార్దన్ రెడ్డిపై బలమైన అభ్యర్థిని రంగంలోకి దించేందుకు చంద్రబాబు ప్రయత్నిస్తున్నారు. దీంతో చంద్రబాబుపై నాగం జనార్దన్ రెడ్డి తన దాడిని ఉధృతం చేసినట్లు కనిపిస్తోంది.

Published On December 17, 2011