చంద్రబాబు, కిరణ్ కుమార్ తోడు దొంగలు: కోదండరామ్

By Pratap

Published: Saturday, December 17, 2011, 11:40 [IST]

మహబూబ్‌నగర్: తెలంగాణ విషయంలో ముఖ్యమంత్రి కిరణ్ కుమార్ రెడ్డి, తెలుగుదేశం పార్టీ అధ్యక్షుడు నారా చంద్రబాబు నాయుడు తోడు దొంగలని తెలంగాణ రాజకీయ జెఎసి చైర్మన్ కోదండరామ్ వ్యాఖ్యానించారు. మహబూబ్‌నగర్ జిల్లా గోరిటలో ఆయన శనివారం తెలంగాణ అమర వీరుల స్థూపాన్ని ఆవిష్కరించి, ప్రసంగించారు. రెండు ప్రాంతాల్లో చంద్రబాబు పార్టీని కాపాడుకుంటూ తెలంగాణ ఉద్యమానికి తూట్లు పొడుస్తున్నారని ఆయన విమర్శించారు. తెలంగాణ ఉద్యమం చల్లబడిందని కొంత మంది అపోహ పడుతున్నారని, తెలంగాణ ఉద్యమం ఉధృతంగా ఉందని ఆయన అన్నారు. తెలంగాణ రాష్ట్రం ఏర్పడే దాకా ఉద్యమం కొనసాగుతుందని ఆయన చెప్పారు.

ఉప ఎన్నికలు కూడా తెలంగాణ ఉద్యమంలో భాగమేనని, తెలంగాణ కోసం రాజీనామా చేసిన నాయకులకు తమ మద్దతు ఉంటుందని ఆయన చెప్పారు. కాంగ్రెసును లక్ష్యంగా చేసుకుని తాము ఉద్యమాన్ని సాగిస్తామని ఆయన అన్నారు. ఎన్నికల్లో కాంగ్రెసు, తెలుగుదేశం పార్టీలను మట్టి కరిపిస్తామని ఆయన అన్నారు. కాంగ్రెసు కుట్ర వల్లనే తెలంగాణపై చర్చ చేయకుండా రాజ్యసభ వాయిదా పడే పరిస్థితి వచ్చిందని ఆయన విమర్శించారు. కాంగ్రెసు, తెలుగుదేశం పార్టీల నాయకులను నిలదీయాలని ఆయన పిలుపునిచ్చారు.

Published On December 17, 2011