టిడిపి నేత దారుణహత్య: అక్రమ తరలింపు అడ్డుకోవడమే

By Srinivas

Published: Sunday, December 18, 2011, 13:48 [IST]

ఖమ్మం: తెలుగుదేశం పార్టీ జిల్లా నాయకుడు ఆదివారం ఉదయం దారుణ హత్యకు గురయ్యాడు. ఖమ్మం జిల్లాలోని నేలకొండపల్లి మండలం అప్పలనరసింహాపురం గ్రామంలో టిడిపి నేత చిట్టి బాబును కొంతమంది దారుణంగా కొట్టి చంపారు. ఐరన్ ఓర్ ఖనిజం తరలింపు విషయంలో వచ్చిన గొడవ హత్యకు దారి తీసినట్లుగా సమాచారం. తమ గ్రామ సమీపంలోని గనుల్లో ఉండే స్పాంజ్ ఐరన్ ఓర్ ఖనిజాన్ని అక్రమంగా తరలిస్తున్నారనే విషయం తెలుసుకున్న చిట్టిబాబు కొంతమందితో కలిసి వెళ్లి వాహనాలను అడ్డుకున్నాడు.

వాహనంలోని ఉన్న డ్రైవర్లు, చిట్టిబాబుకు మధ్య కొంత వాగ్వాదం చోటు చేసుకుంది. గొడవ చినికి చినికి వాన అయింది. డ్రైవర్లు చిట్టిబాబును ఇనుపరాడ్లతో విచక్షణారహితంగా కొట్టారు. దీంతో అతను అక్కడికక్కడే మృతి చెందాడు. దీంతో ఆగ్రహం చెందిన గ్రామస్థులు కాకిరాయి ఐరన్ ఓర్ క్వారీపై దాడి చేశారు. ఫర్నీచర్‌కు నిప్పు పెట్టారు. జనరేటర్‌ను ధ్వంసం చేశారు. దీంతో అక్కడి పరిస్థితి ఉద్రిక్తంగా మారింది.

మరోవైపు మెదక్ జిల్లా చిన్న శంకరంపేట సమీపంలోని కాస్లాపూర్ వద్ద తెల్లవారుజామున జరిగిన రోడ్డు ప్రమాదంలో ఒకరు మృతి చెందారు. ఎదురెదురుగా వస్తున్న ట్రాక్టర్, లారీ ఢీకొనడంతో ఈ ఘటన చోటు చేసుకుంది. ప్రమాదంలో లారీ డ్రైవర్ అక్కడికక్కడమే మృతి చెందగా ఇద్దరికి తీవ్ర గాయాలయ్యాయి.

Published On December 18, 2011