వైయస్ జగన్‌కు తెలంగాణ ఎంట్రీ: టిడిపి గేమ్ ప్లాన్

హైదరాబాద్: తెలంగాణ ఉప ఎన్నికల్లో ఆటంకాలు ఎదురు కాకుండా ఉండడానికి తగిన వ్యూహాన్ని తెలుగుదేశం పార్టీ అనుసరిస్తోంది. తెలంగాణ ఉప ఎన్నికల్లో తగిన ఫలితాలు సాధించడానికి ఆ పార్టీ ప్రయత్నిస్తోంది. తెలంగాణ అంశానికి తామే ప్రవక్తలమని చెప్పుకునే ప్రయత్నం చేస్తోంది. తమ పార్టీ అధ్యక్షుడు నారా చంద్రబాబు నాయుడి గేమ్ ప్లాన్‌ను తెలుగుదేశం నాయకులు అనుసరిస్తున్నట్లు కనిపిస్తున్నారు. తెలంగాణలో జగన్ పర్యటనను అడ్డుకోబోమని తెలుగుదేశం శాసనసభ్యుడు రేవూరి ప్రకాష్ రెడ్డి ఇటీవల ప్రకటన చేశారు. ఈ ప్రకటనలో తెలుగుదేశం వ్యూహరచన దాగి ఉందని అంటున్నారు. చంద్రబాబు తెలంగాణ పర్యటనలను అడ్డుకోబోమని తెలంగాణ జెఎసి నాయకులు ప్రకటించినప్పటికీ ఫలితం అంతగా కనిపించడం లేదు. ఇటీవల చంద్రబాబు పర్యటనలో తెలంగాణవాదుల నుంచి తీవ్ర వ్యతిరేకత ఎదురైంది. చంద్రబాబుపై కోడిగుడ్లతో దాడి చేశారు.

వైయస్ జగన్‌ను అడ్డుకోబోమని చెప్పడం ద్వారా తెలుగుదేశం నాయకులు తమ అధ్యక్షుడు నారా చంద్రబాబు నాయుడిని తెలంగాణవాదులు అడ్డుకోకుండా చూడాలనే వైఖరితో పనిచేస్తున్నారని అంటున్నారు. తెలంగాణపై చంద్రబాబు వైఖరినే వైయస్ జగన్ అనుసరిస్తున్నారు. అందువల్ల జగన్‌ను అడ్డుకోనప్పుడు తమ పార్టీ అధ్యక్షుడు చంద్రబాబును కూడా అడ్డుకోకూడదనే భావన రేవూరి ప్రకాష్ రెడ్డి ప్రకటనలో ఉందని అంటున్నారు. తెలంగాణ కోసం పోరాడండని చంద్రబాబు ఇటీవల వరంగల్లు జిల్లా పరకాల పార్టీ నాయకులకు ఉపదేశించారు కూడా. తెలంగాణ కోసం పోరాడాలని చెబుతూ తాను తెలంగాణకు వ్యతిరేకం కాదని చెప్పుకుంటూ చంద్రబాబు తెలంగాణ ఉప ఎన్నికలను దాటడానికి ప్రయత్నిస్తున్నారు.

English summary

It is clear that TDP Tealangana leaders are trying to get safe passage to their leader N Chandrababu Naidu in Telangana region.