కెసిఆర్! ఉరేసుకుంటావా, రా!!: తాడుతో మోత్కుపల్లి

హైదరాబాద్: ఉరేసుకోవడానికే అన్నట్లు తెలుగుదేశం తెలంగాణ ప్రాంత శాసనసభ్యుడు మోత్కుపల్లి నర్సింహులు శనివారం ఉదయం గన్‌పార్కు వద్ద గల తెలంగాణ అమరవీరుల స్తూపం వద్దకు చేరుకున్నారు. తెలంగాణ కోసం ఉరేసుకుందామని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుకు ఆయన శుక్రవారం సవాల్ చేశారు. ఈ సవాల్ మేరకు ఆయన తాడుతో తెలంగాణ అమరవీరుల స్తూపం వద్దకు చేరుకున్నారు. ఆయన వెంట తెలుగుదేశం తెలంగాణ ప్రాంత శాసనసభ్యులు ఎర్రబెల్లి దయాకర్ రావు, గంగుల కమలాకర్ ఉన్నారు. ఈ సందర్భంగా మోత్కుపల్లి నర్సింహులు కెసిఆర్‌పై తీవ్ర వ్యాఖ్యలు చేశారు. తెలంగాణ ఉద్యమం పేరుతో కెసిఆర్ 50 వేల కోట్ల రూపాయలు సంపాదించారని ఆయన ఆరోపించారు. తెలంగాణ ఓట్లతో గెలిచిన కెసిఆర్ పార్లమెంటులో తెలంగాణ కోసం ఒక్కసారైనా మాట్లాడారా అని ఆయన అడిగారు. నాడు చెన్నారెడ్డి మాటలతో 400 మంది చనిపోతే, నేడు కెసిఆర్ మాటలకు 700 మంది విద్యార్థులు బలయ్యారని ఆయన ఆరోపించారు. ఆత్మహత్యలు చేసుకున్న యువకులు దళితులు, బలహీనవర్గాలవారేనని ఆయన అన్నారు.

తన రాజకీయ పబ్బం గడుపుకోవడానికి కెసిఆర్ మాటలు చెబుతున్నారని ఆయన అన్నారు. ఉరేసుకోవడానికి తాను తాడు తెచ్చానని, దమ్ముంటే కెసిఆర్ ముందుకు రావాలని ఆయన అన్నారు. ఢిల్లీలో చేసుకున్న ఒప్పందాలేమిటో కెసిఆర్ వెల్లడించాలని ఆయన డిమాండ్ చేశారు. రాజకీయ పదవుల కోసం కెసిఆర్ ఢిల్లీలో ఒప్పందాలు చేసుకున్నారు. ఉద్యమం పెద్ద యెత్తున జరుగుతున్న సమయంలో కెసిఆర్ ఎవరూ పిలవకుండానే ఢిల్లీకి వెళ్లి ప్రధాని మన్మోహన్ సింగ్‌ను కలిశారని, కాంగ్రెసు అధ్యక్షురాలు సోనియా గాంధీతో రహస్య అవగాహనకు వచ్చారని, సమ్మె విరమించడానికి పోలవరం టెండర్లను దక్కించుకున్నారని ఆయన ఆరోపించారు. తెలంగాణ వచ్చుడో కెసిఆర్ చచ్చుడో అని చెప్పారని, తల తెగ నరుక్కుంటానని అన్నారని, అయితే తెలంగాణ ప్రజలను కెసిఆర్ బలి పెడుతున్నారని ఆయన అన్నారు.

తెలంగాణ ఉద్యమం గోడకు వేలాడుతున్న తుపాకి అని తెరాస శాసనసభ్యుడు కెటి రామారావు చేసిన వ్యాఖ్యపై ఆయన తీవ్రంగా మండిపడ్డారు. అది పనికి రాని తుపాకి అని ఆయన అన్నారు. కెసిఆర్ పిట్టల దొరలాగా వ్యవహరిస్తున్నారని ఆయన అన్నారు. ఇప్పటి నిజాం కెసిఆర్ అని, నయా నిజాం కెసిఆర్‌ను తిప్పికొట్టాలని ఆయన పిలుపునిచ్చారు.

English summary

Challenging TRS president K Chandrasekhar Rao, TDP Telangana MLA Mothkupalli Narasimhulu reached gun park with rope.