బాబుకు రెడ్ కార్పెట్ విద్యార్థుల యాత్రకు అడ్డా?: నాగం

హైదరాబాద్: తెలంగాణ ప్రాంతంలో తెలుగుదేశం పార్టీ అధినేత నారా చంద్రబాబు నాయుడుకు రెడ్ కార్పెట్ వేసి యాత్ర చేసేందుకు అనుమతించిన పోలీసులు తెలంగాణ విద్యార్థులకు యాత్రకోసం అనుమతి ఇవ్వకపోవడం ఏమిటని తెలంగాణ నగారా సమితి అధ్యక్షుడు నాగం జనార్ధన్ రెడ్డి సోమవారం ప్రశ్నించారు. తెలంగాణ ప్రజలను చైతన్య పరిచేందుకు ఉస్మానియా విశ్వవిద్యాలయ విద్యార్థి ఐక్య కార్యాచరణ సమితి నేతలు తెలంగాణ చైతన్య యాత్రను ప్రారంభించారు. నాగం జనార్ధన్ రెడ్డి, తెలంగాణ ప్రజా ఫ్రంట్ అధ్యక్షుడు గద్దర్, మాజీ డిఎస్పీ నళిని ఈ యాత్రకు మద్దతు తెలిపారు.

వీరి యాత్రను పోలీసులు ఓయు మెయిన్ గేట్ వద్ద అడ్డుకున్నారు. దీంతో బాబుకు యాత్రకు రెడ్ కార్పెట్ వేసి విద్యార్థులను అడ్డుకోవడమేమిటని నాగం ధ్వజమెత్తారు. తెలంగాణ ప్రాంత పోలీసులు లాఠీలు వదిలి ఉద్యమంలోకి వస్తే సీమాంధ్ర పోలీసు ఉన్నతాధికారుల భరతం పడదామని పిలుపునిచ్చారు. 1969లో తెలంగాణ ఉద్యమాన్ని రాజకీయ నాయకులు వెనక్కి తీసుకు వెళ్లగా, ఇప్పుడు రాజకీయ నేతల వల్లే వచ్చిన తెలంగాణ వెనక్కి పోయిందని గద్దర్ విమర్శించారు.

English summary

Telangana Nagara Samithi president Nagam Janardhan Reddy fired at police for obstruct students cycle yatra at OU main gate.