శోభానాగిరెడ్డి రాజీనామా, పిఆర్పీది మోసమన్న ఎమ్మెల్యే

By Srinivas

Published: Tuesday, December 27, 2011, 16:36 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు, కడప ఎంపీ వైయస్ జగన్మోహన్ రెడ్డి వర్గం శాసనసభ్యురాలు శోభా నాగి రెడ్డి మంగళవారం తన రాజీనామా లేఖను సమర్పించారు. స్పీకర్ నాదెండ్ల మనోహర్ అందుబాటులో లేకపోవడంతో రాజీనామాను అసెంబ్లీ కార్యదర్శి సదారాంకు అందజేశారు. కాగా అంతకుముందు ఆమె మీడియాతో మాట్లాడారు. ప్రజారాజ్యం పార్టీ ఓటు వేసి గెలిపించిన ప్రజలను మోసం చేసిందని విమర్శించారు. అలాంటి పిఆర్పీ ఇచ్చిన విప్‌కు విలువ ఉండదన్నారు. జగన్ ఆలోచన మేరకు రైతులు, కూలిల కోసమే తాము ప్రజల్లోకి వెళ్లాలని నిర్ణయించుకున్నామని చెప్పారు. పిఆర్పీ ఇచ్చిన అనర్హత పిటిషన్‌పై నిర్ణయం తీసుకుంటే తాను కోర్టుకు వెళతానని చెప్పారు.

రాజీనామా సమర్పించిన అనంతరం ఆమె విలేకరులతో మాట్లాడుతూ తాను ఉప ఎన్నికల్లో వైయస్సార్సీ పార్టీ నుండి గెలవాలనుకుంటున్నానని, కనుమరుగైన పార్టీ ఎమ్మెల్యేగా కొనసాగాలనుకోవడం లేదన్నారు. ఇప్పటికే కాంగ్రెసులో చేరిన వంగా గీతకు విప్ ఇచ్చే హక్కు లేదన్నారు. తనపై అనర్హత వేటు వేస్తే కోర్టుకు వెళ్లి స్టే తెచ్చుకుంటానన్నారు. చిరంజీవి తన ఎమ్మెల్యేలతో రాజీనామా చేయించి ఎన్నికలకు వెళ్లాలని డిమాండ్ చేశారు. కాపు రామచంద్రా రెడ్డి వెనక్కి తగ్గలేదన్నారు. ఉప ఎన్నికల్లో ప్రభుత్వంపై ఉన్న వ్యతిరేకత బహిర్గతమవుతుందన్నారు. ధైర్యం లేకే తాము చేసిన రాజీనామాలను ఆమోదించడం లేని విమర్శించారు. ప్రజావిశ్వాసం పొందేందుకే రాజీనామా అన్నారు. ఎవరు డ్రామాలు ఆడుతున్నారో ప్రజలు గమనిస్తున్నారన్నారు.

Published On December 27, 2011