కెసిఆర్‌పై వ్యాఖ్యలు, విశాలాంధ్ర సమావేశం రచ్చరచ్చ

హైదరాబాద్: తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావుపై అనుచిత వ్యాఖ్యలు చేయడంతో హైదరాబాదులోని సుందరయ్య కళాభవనంలో ఏర్పాటు చేసిన విశాలాంధ్ర మహాసభ రచ్చరచ్చ అయింది. గురువారం విశాలాంధ్ర ప్రతినిధులు సమావేశం ఏర్పాటు చేశారు. ఈ సందర్భంగా పలువురు ప్రతినిధులు కెసిఆర్ తీరును తప్పు పట్టారు. హైదరాబాదులో ఉండాలంటే కెసిఆర్ అనుమతి తీసుకోవాలా? హైదరాబాద్ ఏమన్నా కెసిఆర్ అబ్బ సోత్తా? అని వారు అన్నారు. సమావేశానికి హాజరైన తెలంగాణ జర్నలిస్టులు వారి వ్యాఖ్యలపై మండిపడ్డారు. విశాలాంధ్ర ప్రతినిధులు క్షమాపణ చెప్పాలని డిమాండ్ చేశారు. అభివృద్ధిపై అబద్దాలు చెబుతున్నారని నిలదీశారు.

సమావేశంలో పాల్గొన్న ప్రముఖ స్వతంత్ర సమరయోధురాలు సుగుణమ్మ ఆందోళన చేస్తున్న జర్నలిస్టులకు నచ్చజెప్పే ప్రయత్నాలు చేశారు. అయినా వారు వినిపించుకోలేదు. పరిస్థితి ఉద్రిక్తంగా మారటంతో పోలీసులు వారిని సమావేశం నుండి బయటకు పంపించారు. కెసిఆర్‌పై అనుచిత వ్యాఖ్యలు చేశారంటూ టిఆర్ఎస్ కార్యకర్తలు ర్యాలీ నిర్వహించే ప్రయత్నాలు చేశారు. పోలీసులు వారిని అడ్డుకున్నారు. కాగా విశాలాంధ్ర గతంలో ఏర్పాటు చేసిన సమావేశాలు కూడా ఉద్రిక్తతకు దారి తీసిన విషయం తెలిసిందే.

English summary

Vishalandhra meeting created very tension with comments on trs chief K Chandrasekhar Rao.