మాకు షాపుల్లో 27 శాతం వాటా, సిఎంను కలిశా: బొత్స

By Srinivas

Published: Thursday, December 29, 2011, 16:57 [IST]

హైదరాబాద్: తమ కుటుంబానికి 31 మద్యం దుకాణాల్లో 27 శాతం వాటా ఉందని ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణ గురువారం అన్నారు. మద్యం విషయంలో నిబంధనలు ఉల్లంఘిస్తే వ్యాపారం నుండి బయటకు రావాలని తన కుటుంబ సభ్యులను కోరానన్నారు. మూడు రోజుల క్రితం మద్యం విషయమై ముఖ్యమంత్రికి లేఖ రాశానని చెప్పారు. నాపై బురద జల్లే ప్రయత్నాలు జరుగుతున్నాయని, ఈ అంశంలో సిట్టింగ్ జడ్జితో గానీ, సిబిఐతో గాని విచారణ జరిపించాలని ముఖ్యమంత్రిని కోరానని తెలిపారు. తనపై విచారణ జరిగితే టిడిపి అధినేత నారా చంద్రబాబు నాయుడులా కోర్టుకు వెళ్లి స్టే తెచ్చుకోనని విచారణ ఎదుర్కొంటానన్నారు.

పదిరోజులుగా లిక్కర్ కరప్షన్‌పై కథనాలు వస్తున్నాయన్నారు. అక్రమాలపై టోల్ ఫ్రీ నెంబరు ఏర్పాటు చేస్తున్నామని మద్యాన్ని ఎమ్మార్పీ కంటే ఎక్కువకు అమ్మితే ఫిర్యాదు చేయవచ్చునన్నారు. త్వరలో కాంగ్రెసు ఆఫీకులో కూడా టోల్ ఫ్రీ నెంబరు ఏర్పాటు చేస్తామన్నారు. మద్యం సిండికేట్లలో తెలుగుదేశం పార్టీ నేతలకే యాభై శాతం వాటా ఉందన్నారు.

Published On December 29, 2011