మొదటి వారంలో కిరణ్ రెడ్డి కెబినెట్లోకి చిరంజీవి వర్గం?

By Srinivas

Published: Friday, December 30, 2011, 10:30 [IST]

హైదరాబాద్: తిరుపతి శాసనసభ్యుడు చిరంజీవి వర్గం ఎమ్మెల్యేలకు కిరణ్ కుమార్ రెడ్డి మంత్రివర్గంలో జనవరి మొదటి వారంలో చోటు కల్పించనున్నారని సమాచారం. రెండు రోజుల క్రితం ఢిల్లీ వెళ్లిన సిఎం కిరణ్ తెలంగాణలో జరగబోయే ఉప ఎన్నికలు, మంత్రివర్గ విస్తరణ అంశాలపై చర్చిస్తున్నారన్నట్లుగా తెలుస్తోంది. అధిష్టానం చిరు వర్గానికి చెందిన ఇద్దరికి మంత్రివర్గంలో చోటు కల్పించేందుకు సుముఖత వ్యక్తం చేసినట్లుగా తెలుస్తోంది. అసెంబ్లీలో ప్రభుత్వానికి చిరు అండగా నిలిచి ఇరవై రోజులు దాటింది. అప్పుడే అధిష్టానం హామీ ఇచ్చింది. ఇప్పటికే హామీపై చాలా ఆలస్యమైందని మరింత ఆలస్యమైతే బావుండదనే ఉద్దేశ్యంతో కాంగ్రెసు పెద్దలు సాధ్యమైనంత తొందరగా వారిని మంత్రివర్గంలోకి తీసుకోవాలని సూచించారని సమాచారం.

కిరణ్ ఢిల్లీ నుండి తిరిగి వచ్చాక చిరంజీవి, ఆయన వర్గంతో భేటీ అయి ఎవరికి పదవులు ఇవ్వాలో చర్చించి ఎంపిక చేస్తారని సమాచారం. దాంతో పాటే ఏ శాఖలు ఇవ్వాలనే అంశం పైనా వారు చర్చించనున్నారని సమాచారం. జూపల్లి, కోమటిరెడ్డి రాజీనామాతో ఖాళీ అయిన శాఖలతో పాటు మరికొన్ని శాఖలు సిఎం అట్టి పెట్టుకున్నారు. కేటాయించవలసిన శాఖలను చర్చించిన తర్వాత జనవరి మొదటి వారంలో వారిని కేబినెట్లోకి తీసుకుంటారని సమాచారం.

Published On December 30, 2011