తెలంగాణ ఉప ఎన్నికల్లో కాంగ్రెసు పోటీ వద్దు: వివేక్

By Pratap

Published: Saturday, December 31, 2011, 15:03 [IST]

కరీంనగర్/ హైదరాబాద్: తెలంగాణలో జరిగే ఉప ఎన్నికల్లో తమ పార్టీ పోటీ చేయకూడదని కాంగ్రెసు తెలంగాణ ప్రాంత పార్లమెంటు సభ్యుడు జి. వివేక్ అన్నారు. తెలంగాణ ఉప ఎన్నికల్లో పోటీ చేయకూడని తాను పార్టీ అధిష్టానాన్ని కోరుతానని ఆయన శనివారం మీడియా ప్రతినిధుల సమావేశంలో చెప్పారు. తెలంగాణలో 40 శాతం అభివృద్ధి జరిగిందనే ముఖ్యమంత్రి కిరణ్ కుమార్ రెడ్డి మాటల్లో వాస్తవం లేదని ఆయన అన్నారు. జాతీయ రహదారుల అభివృద్ధి పనుల్లో కూడా తెలంగాణకు అన్యాయం జరుగుతోందని ఆయన అన్నారు. తెలంగాణకు మద్దతిచ్చే వారు ఎవరైనా తెలంగాణలో పర్యటించవచ్చునని ఆయన చెప్పారు.

తెలంగాణ ఉప ఎన్నికల్లో పోటీ చేయకూడదనే వైయస్సార్ కాంగ్రెసు పార్టీ అధ్యక్షుడు వైయస్ జగన్ నిర్ణయాన్ని ఆర్టీసి మాజీ చైర్మన్ గోనె ప్రకాశ రావు హర్షించారు. జగన్ నిర్ణయం శుభపరిణామమని ఆయన శనివారం హైదరాబాదులో అన్నారు. రోజుకో మాట చెబుతూ తెలంగాణ ప్రజలను కాంగ్రెసు మభ్యపెట్టే ప్రయత్నం చేస్తోందని, కాంగ్రెసుకు గుణపాఠం చెప్పే విధంగా ఫలితాలు ఉంటాయని ఆయన అన్నారు. ఉప ఎన్నికల్లో పోటీ చేయవద్దని తెలుగుదేశం తెలంగాణ ప్రాంత నాయకులు చంద్రబాబు నాయుడిపై ఒత్తిడి తేవాలని ఆయన కోరారు.

Published On December 31, 2011