చిరును సంప్రదించాకే, 2014 ఎన్నికలే రిఫరెండం: సిఎం

By Srinivas

Published: Sunday, January 1, 2012, 13:04 [IST]

హైదరాబాద్: తిరుపతి శాసనసభ్యుడు చిరంజీవి వర్గానికి మంత్రివర్గంలో చోటు, తెలంగాణలోని ఉప ఎన్నికల అంశంపై ముఖ్యమంత్రి కిరణ్ కుమార్ రెడ్డి ఆదివారం మాట్లాడారు. తమకు ఉప ఎన్నికలు రిఫరెండం కాదని, 2014 ఎన్నికలే రిఫరెండం అన్నారు. ప్రస్తుత ఉప ఎన్నికలు ప్రత్యేక పరిస్థితుల్లో జరుగుతున్నందున రిఫరెండం కాదన్నారు. అభివృద్ధి, సంక్షేమ నినాదంతో ప్రచారం చేస్తామన్నారు. సరైన సమయంలో అభ్యర్థులను ఖరారు చేస్తామని తెలిపారు. ప్రభుత్వ పని తీరు పైనే ఎన్నికల ఫలితాలు ఉంటాయన్నారు. చిరంజీవిని, అధిష్టానాన్ని సంప్రదించాకే ప్రజారాజ్యం పార్టీ ఎమ్మెల్యేలకు మంత్రివర్గంలో చోటు కల్పిస్తామన్నారు. మంత్రివర్గంలోకి ఎవరి పేరు ప్రతిపాదించినా అసంతృప్తి సహజమేనన్నారు.

త్వరలో నామినేటెడ్ పోస్టులు భర్తీ చేస్తామని తెలిపారు. ఈఆర్సీ నివేదిక అందాక విద్యుత్ ఛార్జీల సబ్సిడీపై నిర్ణయం తీసుకుంటామన్నారు. గ్రామీణ ప్రాంతాల్లోని ఆరోగ్య కేంద్రాలలో నాలుగు వందల మంది డాక్టర్లను కాంట్రాక్టు పద్ధతిలో తీసుకుంటామన్నారు. ఇక నుండి అన్ని నోటిఫికేషన్లకు రెండేళ్ల వయో పరిమితి పెంచుతామన్నారు. విద్యుత్ కోత వల్లే ఇబ్బందులు తలెత్తుతున్నాయన్నారు.

Published On January 1, 2012