జగన్ ఎమ్మెల్యేలు, పిఆర్పీ తీరు సరికాదు: దత్తాత్రేయ

హైదరాబాద్: వైయస్సార్ కాంగ్రెసు పార్టీ అధ్యక్షుడు, కడప ఎంపీ వైయస్ జగన్మోహన్ రెడ్డి వర్గం శాసనసభ్యులు అసెంబ్లీలో విప్‌ను ధిక్కరించిన పరిస్థితి పార్లమెంటరీ సంప్రదాయాలను మంటగలిపాయని భారతీయ జనతా పార్టీ సీనియర్ నేత బండారు దత్తాత్రేయ ఆదివారం అన్నారు. ముఖ్యమంత్రి కిరణ్ కుమార్ రెడ్డి ఎలాంటి నిర్ణయాలు తీసుకోలేని అసహాయస్థితిలో ఉన్నారన్నారు. కాంగ్రెసులో ప్రజారాజ్యం పార్టీ విలీనం, జగన్ ఎమ్మెల్యేలు విప్ ధిక్కరించడం పార్లమెంటరీ సంప్రదాయాలు మంటగలిపాయన్నారు. స్పీకర్ పదవిని కాంగ్రెసు స్వప్రయోజనాలకు వాడుకోవడం బాధాకరమన్నారు. రాజ్యాంగ సంస్థలను దుర్వినియోగం చేయడం కాంగ్రెసుకు అలవాటే అన్నారు.

రాష్ట్రంలో మద్యం సిండికేట్ల అక్రమాల్లో ప్రమేయం ఉన్న మంత్రులు, ఎమ్మెల్యేల పైన చర్యలు తీసుకునేందుకు కిరణ్ భయపడుతున్నారన్నారు. గత సంవత్సరం రైతులకు గడ్డు పరిస్థితి అయితే ఈ సంవత్సరం ముఖ్యమంత్రి, కాంగ్రెసుకు గడ్డుకాలమవుతుందన్నారు. వచ్చే ఏ ఎన్నికల్లోనైనా ప్రజలు కాంగ్రెసుకు బుద్ది చెప్పేందుకు సిద్ధంగా ఉన్నారన్నారు.

English summary

BJP senior leaders Bandaru Dattatreya condemned Jagan mlas and PRP attitude at the time of no-confedence motion.