టీవీ 18 చేతుల్లోకి రామోజీ రావు ఈటీవీ చానెళ్లు

By Pratap

Published: Tuesday, January 3, 2012, 17:27 [IST]

ముంబై: మీడియా దిగ్గజం రామోజీ రావుకు చెందిన ఈటీవీ చానెళ్లను కొనుగోలు చేస్తున్నట్లు టీవీ18 బ్రాడ్‌కాస్ట్ లిమిటెడ్ మంగళవారం ప్రకటించింది. పది ఈటీవీ ప్రాంతీయ చానెళ్ల కొనుగోలుకు 2100 కోట్ల రూపాయలు చెల్లించనున్నట్లు తెలిపింది. టీవీ18 బ్రాడ్‌కాస్ట్ లిమిటెడ్ బోర్డు యాజమాన్యం ఈ డీల్‌కు ఆమోదం తెలిపింది. ఈటీవీ తెలుగు, ఈటీవీ2 తెలుగు తప్ప మిగతా ఈటీవీ చానెళ్ల యాజమాన్యాన్ని టీవీ 18 తన చేతుల్లోకి తీసుకుంటుంది. రెండు తెలుగు చానెళ్లలో టీవీ18 24.5 శాతం వాటాను కొనుగోలు చేసింది. దీంతో ఈ రెండు చానెళ్ల నిర్వహణ రామోజీ రావు చేతుల్లోనే ఉంటుంది.

ఈటీవీ ఉత్తరప్రదేశ్, ఈటీవీ మధ్యప్రదేశ్, ఈటీవీ రాజస్థాన్, ఈటీవీ బీహార్, ఈటీవీ ఉర్దూ చానెళ్లలో వంద శాతం వాటాను, ఈటీవీ మరాఠీ, ఈటీవీ కన్నడ, ఈటీవి బంగ్లా, ఈటీవీ గుజరాతీ, ఈటీవీ ఒరియా చానెళ్లలో 50 శాతం వాటాను టీవీ 18 కొనుగోలు చేస్తుంది. డీల్‌లో భాగంగా నెట్‌వర్క్ 18, టీవీ 18 రిలయన్స్ అనుబంధ సంస్థ ఇన్ఫోటెల్ సర్వీసెస్ లిమిటెడ్ (ఇన్ఫోటెల్)తో అవగాహనా ఒప్పందం చేసుకున్నాయి. ఈటీవీ ప్రాంతీయ చానెళ్ల కొనుగోలుకు గత కొంత కాలంగా నెట్‌వర్క్ 18 చర్చలు సాగిస్తున్న విషయం తెలిసిందే.

Published On January 3, 2012