కార్తీక రెడ్డి స్థానంలో మజీద్, నగర మేయర్‌గా హుస్సేన్

By Srinivas

Published: Tuesday, January 3, 2012, 10:01 [IST]

హైదరాబాద్: హైదరాబాద్ నగర నూతన మేయర్‌గా మహ్మద్ మజీద్ హుస్సేన్‌ మంగళవారం ఎంపికయ్యారు. ఎంఐఎం పార్టీ మేయర్ పదవికి అహ్మద్ నగర్ కార్పోరేటర్ హుస్సేన్‌ను ఎంపిక చేసి విప్ జారీ చేసింది. కాంగ్రెసు పార్టీ కూడా తన పార్టీ కార్పోరేటర్లకు విప్ జారీ చేసింది. కార్పోరేటర్లు మేయర్‌గా హుస్సేన్‌ను, డిప్యూటీ మేయర్‌గా కవాడిగూడ కార్పోరేటర్ రాజ్‌కుమార్‌ను ఎన్నుకోనున్నారు. మంగళవారం ఉదయం పదకొండు గంటలకు జిహెచ్ఎంసి ప్రధాన కార్యాలయంలో కౌన్సిల్ సమావేశం జరగనుంది. ఆ తర్వాత అధికారికంగా ప్రకటిస్తారు.

కాగా నెల రోజుల క్రితం అప్పటి మేయర్ కార్తీక రెడ్డి తన పదవికి రాజీనామా చేసిన విషయం తెలిసిందే. కాంగ్రెసు - ఎంఐఎం ఒప్పందంలో భాగంగా కార్తీక రెడ్డి రాజీనామా చేశారు. ఐదేళ్ల పాలనలో మొదటి రెండేళ్లు కాంగ్రెసు, ఆ తర్వాత రెండేళ్లు ఎంఐఎం, చివరి ఏడాది మళ్లీ కాంగ్రెసుకు మేయర్‌గా అవకాశం దక్కుతుంది.

Published On January 3, 2012