టిడిపి ఎమ్మెల్యే ఆనందబాబు తనయుడి అదృశ్యం

By Pratap

Published: Tuesday, January 3, 2012, 18:30 [IST]

గుంటూరు: తెలుగుదేశం గుంటూరు జిల్లా వేమూరు శాసనసభ్యుడు నక్కా ఆనంద బాబు తనయుడు అఖిలేష్ అదృశ్యమయ్యాడు. మంగళవారం ఉదయం 9 గంటల నుంచి అతని ఆచూకీ కనిపించడం లేదు. తన మిత్రుడు చందూతో కలిసి అఖిలేష్ చెప్పాపెట్టకుండా వెళ్లిపోయినట్లు భావిస్తున్నారు. తన కుమారుడి అదృశ్యమైన విషయంపై ఆనంద బాబు పోలీసులకు ఫిర్యాదు చేశారు. పోలీసులు గుంటూరు, కృష్ణా జిల్లాలో గాలిస్తున్నారు. తన కుమారుడు కిడ్నాపై ఉండడని, అలిగి వెళ్లిపోయి ఉంటాడని ఆయన చెప్పారు. రైలు ఎక్కి తన బంధువుల ఇంటికి వెళ్లి ఉంటాడని కూడా ఆయన అనుమానాలు వ్యక్తం చేస్తున్నారు.

అఖిలేష్ నల్లపాడులో లయోలా విద్యాసంస్థలో ఏడో తరగతి చదువుతున్నాడు. క్రిస్మస్ సెలవుల తర్వాత పాఠశాలను మంగళవారమే తెరిచారు. ఉదయం పూట బయటకు వెళ్తుండగా, స్కూలుకు వెళ్లడానికి బూట్లు వేసుకోవాలని ఇంట్లోవారు అఖిలేష్‌కు చెప్పారు. వెళ్తానంటూనే అతను బయటకు వెళ్లిపోయాడు. ఆ తర్వాత తిరిగి రాలేదు. దీంతో అఖిలేష్ కోసం అతని మిత్రుల ఇళ్లలో వాకబు చేయగా, చందూ కూడా కనిపించడం లేదని తెలిసింది. దీంతో వారిద్దరు కలిసి ఎక్కడికో పారిపోయి ఉంటారని అనుమానిస్తున్నారు.

Published On January 3, 2012