సిడీల సమరం: కెసిఆర్, చంద్రబాబుల్లో ఎవరెటు?

హైదరాబాద్: తెలుగుదేశం, తెలంగాణ రాష్ట్ర సమితి (తెరాస) పార్టీల మధ్య సిడీల పోరు ఊపందుకుంది. రెండు పార్టీల నాయకులు పరస్పరం తిట్ల దండకం ఎత్తుకున్నారు. ఇరు పార్టీల నాయకులు కూడా ప్రత్యర్థి పార్టీల అధినేతలను దుమ్మెత్తిపోస్తున్నారు. వారి తిట్ల దండకం హద్దులు దాటుతున్న సందర్భాలు కూడా ఉన్నాయి. కెసిఆర్‌ను తెలుగుదేశం పార్టీ తెలంగాణ నాయకులు తిట్లతో సత్కరిస్తుంటే, చంద్రబాబుపై తెరాస నాయకులు అదే స్థాయిలో సమాధానాలు ఇస్తున్నారు. తిట్లు చాలవన్నట్లు ఇరు పార్టీల అధినేతల వైఖరులను తప్పు పడుతూ ఇరు పార్టీల నాయకులు సిడీలను విడుదల చేశారు. తెలంగాణకు వ్యతిరేకంగా కెసిఆర్ తెలుగుదేశంలో ఉన్నప్పుడు 1996లో మాట్లాడారని నిరూపించడానికి తెలుగుదేశం శాసనసభ్యుడు మోత్కుపల్లి నరసింహులు ఓ సిడీని విడుదల చేశారు. తెలుగుదేశం ప్రభుత్వ హయాంలో మంత్రిగా ఉన్న కెసిఆర్ 610 జీవోకు వ్యతిరేకంగా, జోనల్ విధానానికి వ్యతిరేకంగా మాట్లాడిన సీడీలను ఆయన విడుదల చేశారు. వీడియో సీడిలో కెసిఆర్ అప్పటి మాటలను ప్రదర్శించి చూపించారు. అప్పుడు తెలుగుదేశంలో ఉన్నారు కాబట్టి ఆ పార్టీ వైఖరిని కెసిఆర్ అప్పుడు వినిపించారని, తెలుగుదేశం వైఖరి నచ్చకే బయటకు వచ్చి తెలంగాణ కోసం పార్టీ పెట్టారని తెరాస శాసనసభ్యుడు కెటి రామారావు అన్నారు.

మోత్కుపల్లి విడుదల చేసిన సీడికి సమాధానం చెప్పడానికి తెరాస నాయకులు వీడియో సీడీని విడుదల చేశారు. తెలంగాణకు వ్యతిరేకంగా చంద్రబాబు ఎలా వ్యవహరించారో, ఎప్పుడు ఎలా మాట్లాడారో ఈ సీడీలో వారు చూపించారు. తెలంగాణ రాష్ట్ర ఏర్పాటుకు శాసనసభలో తీర్మానం పెడితే తాము మద్దతిస్తామని చెప్పిన మాటలను సీడిలో చేర్చి, తన మాటకు విరుద్ధంగా ఎలా మాట్లాడారో ఆ తర్వాత చూపించారు. తెలంగాణ రాష్ట్ర ఏర్పాటుకు ప్రక్రియను ప్రారంభిస్తున్నట్లు కేంద్ర హోం మంత్రి చిదంబరం ప్రకటనను వ్యతిరేకించడానికి చంద్రబాబు ఎటువంటి మాటలను ముందు పెట్టారో చూపించారు. అర్ధరాత్రి ఓ పెద్ద అంశంపై మంత్రులు, పార్లమెంటు సభ్యులతో మాట్లాడకుండా నిర్ణయం వెలువరించారని, కర్ణాటకకు చెందిన వీరప్ప మొయిలీ, తమిళనాడుకు చెందిన వీరప్ప మొయిలీ కుట్ర చేశారని చంద్రబాబు విమర్శించారు. తెలంగాణ ఏర్పాటుపై మాట్లాడుతూ ఆలు లేదు, చూలు లేదు, కొడుకు పేరు సోమలింగం అంటూ ఎద్దేవా చేసిన మాటలు కూడా ఆ సీడీలో ఉన్నాయి. తెలంగాణకు వ్యతిరేకంగా చంద్రబాబు ఎలా మాట్లాడారో ఆ సీడిలో చూపించడానికి తెరాస నాయకులు ప్రయత్నించారు. అయితే, తమ పార్టీ అధ్యక్షుడు నారా చంద్రబాబు నాయుడు తెలంగాణకు అనుకూలంగా ఉన్నారని తెలుగుదేశం పార్టీ తెలంగాణ నాయకులు చెబుతున్నారు.

English summary

Cds fight is going on between Telugudesam and TRS on Telangana issue.