ఎన్టీఆర్ భవన్ పేరును మార్చాలి: బాబుకు మోపిదేవి

చిత్తూరు: తెలుగుదేశం పార్టీ కార్యాలయం ఎన్టీఆర్ భవనం పేరును బ్రాంది భవనంగా మారిస్తే బాగుంటుందని మంత్రి మోపిదేవి వెంకట రమణ గురువారం చిత్తూరు జిల్లా తిరుపతిలో అన్నారు. ఈ సందర్భంగా ఆయన టిడిపి అధినేత నారా చంద్రబాబుపై విరుచుకు పడ్డారు. స్వర్గీయ నందమూరి తారక రామారావు మద్యం దుకాణాలను నిషేధిస్తే చంద్రబాబు వాటిని బార్లా తెరిచారని ఆయన విమర్శించారు. బాబు తాను అధికారంలోకి వచ్చాక ఎప్పటి నుండి అయితే మద్యం దుకాణాలపై నిషేధం ఎత్తి వేశారో అప్పటి నుండి బెల్టు షాపులు పెరిగాయన్నారు. అలాంటి చంద్రబాబు ఈ విషయంలో కాంగ్రెసు పార్టీపై విమర్శలు గుప్పించడం శోచనీయమన్నారు.

కాగా మంత్రి మోపిదేవి కాన్వాయ్‌ను తెలుగుదేశం పార్టీ కార్యకర్తలు అడ్డుకున్నారు. మద్యంను ఎమ్మార్పీ ధరకే అమ్మాలని వారు ఆందోళన చేశారు. కాన్వాయ్ ముందు బైఠాయించారు. కాంగ్రెసు ప్రభుత్వం మద్యం పేరుతో ప్రజల నుండి డబ్బులు దండుకుంటుందన్నారు. కాంగ్రెసుకు రాష్ట్రాన్ని పాలించే హక్కు లేదని విమర్శించారు. పరిస్థితి అదుపు తప్పకుండా ఉండేందుకు పోలీసులు టిడిపి కార్యకర్తలను చెదరగొట్టారు.

English summary

Minister Mopidevi Venkata Ramana suggested TDP chief Chandrababu Naidu to change NTR Bhavan name as brandhi bhavan.