సిఎంకోసం పోటీపడే వ్యక్తి మాటలా?:బొత్సపై నారాయణ

విజయవాడ: ముఖ్యమంత్రి పీఠం కోసం పోటీ పడే ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణ బరితెగించి మాట్లాడుతున్నారని సిపిఐ రాష్ట్ర కార్యదర్శి నారాయణ గురువారం అన్నారు. మద్యం తాగే వారిదే తప్పని, అమ్మే వారిది తప్పు కాదని ఆయన మాట్లాడినట్లు చూశానని, సిఎం కోసం పోటీ పడే వ్యక్తి, పిసిసి అధ్యక్షుడిగా, మంత్రిగా ఉన్న వ్యక్తి మాట్లాడేది ఇలాగేనా అని ప్రశ్నించారు. ఇలాంటి వారు ప్రభుత్వంలో ఉండటం దారుణమన్నారు. ఆయన వ్యాఖ్యలను తాను తీవ్రంగా ఖండిస్తున్నానన్నారు. నారాయణ గురువారం కృష్ణా జిల్లాలో కల్తీసారా బాధితులను పరామర్శించారు. ఈ సందర్భంగా ఆయన విలేకరులతో మాట్లాడారు.

మద్యం మాఫియాను సమర్థించే విధంగా బొత్స వ్యాఖ్యలు ఉన్నాయన్నారు. ఆయన మద్యం వ్యాపారంలో ఉన్నాడు కాబట్టే వ్యాపారస్తులకు అనుకూలంగా మాట్లాడారన్నారు. ప్రభుత్వానికి దమ్ముంటే మైలవరం ఘటన వెనుక ఏ పార్టీ హస్తం ఉందో బయట పెట్టాలన్నారు. కల్తీ సారా ఘటనపై నైతిక బాధ్యత వహిస్తూ ముఖ్యమంత్రి కిరణ్ కుమార్ రెడ్డి వెంటనే రాజీనామా చేయాలని డిమాండ్ చేశారు.

English summary

CPI Narayana condemned PCC chief Botsa Satyanarayana statement on liquor issue. He demanded CM Kiran Kumar Reddy to resign.