బాబు రక్తం కళ్ల చూశారు, మూల్యం తప్పదు: నాగం

By Pratap

Published: Friday, January 6, 2012, 16:44 [IST]

హైదరాబాద్: తెలుగుదేశం పార్టీ అధ్యక్షుడు నారా చంద్రబాబు నాయుడు తెలంగాణ ఉద్యమకారుల రక్తం కళ్ల చూశారని, అందుకు మూల్యం చెల్లించుకుంటారని తెలంగాణ నగారా సమితి నాయకుడు నాగం జనార్దన్ రెడ్డి అన్నారు. చంద్రబాబు తెలంగాణ పర్యటనను ఆయన తీవ్రంగా వ్యాఖ్యానించారు. చంద్రబాబు వరంగల్ జిల్లా పర్యటన బలప్రదర్శనలాగా ఉందే గానీ రైతుల కోసం చేసిన యాత్ర మాదిరిగా లేదని ఆయన శుక్రవారం మీడియా ప్రతినిధుల సమావేశంలో అన్నారు. ఐదారు వాహనాల్లో కత్తులు కటార్లు, రివాల్వర్లు పెట్టుకుని సీమాంధ్ర రౌడీలను, గుండాలను వెంటపెట్టుకుని చంద్రబాబు యాత్ర చేశారని, ఇది చంద్రబాబు రౌడీ యాత్ర మాత్రమేనని ఆయన అన్నారు. ముఖ్యమంత్రి కిరణ్ కుమార్ రెడ్డి, చంద్రబాబు ఏకమై తెలంగాణ ఉద్యమకారులపై దాడులు చేయిస్తున్నారని ఆయన విమర్శించారు.

చంద్రబాబు పర్యటనకు ప్రభుత్వం భారీ భద్రతను కల్పించిందని, రాష్ట్రపతి, ప్రధాని పర్యటనలకు కూడా ఇంత భద్రత ఉండదని ఆయన అన్నారు. చంద్రబాబు పర్యటనకు ఏర్పాటు చేసిన బందోబస్తుకు ఖర్చు చేసిన సొమ్మును రైతులకు ఖర్చు చేస్తే సంతోషించేవారని ఆయన అన్నారు. చంద్రబాబు భద్రతకు పెట్టిన ఖర్చు ఎంతో చెప్పాలని ఆయన డిమాండ్ చేశారు. చంద్రబాబు వెంట ఉన్న రౌడీలను ఎందుకు అరెస్టు చేయలేదని ఆయన పోలీసులను ప్రశ్నించారు. బలప్రదర్శన కోసమే తెలంగాణ రాష్ట్ర సమితి (తెరాస), తెలుగుదేశం పార్టీలు ఘర్షణకు దిగుతున్నాయని ఆయన అన్నారు.

Published On January 6, 2012