హన్మకొండలో ఎర్రబెల్లి ఇంటికి నిప్పు!, ఎమ్మెల్యేపై దాడి

వరంగల్: హన్మకొండలోని తెలుగుదేశం పార్టీ సీనియర్ శాసనసభ్యుడు ఎర్రబెల్లి దయాకర రావు ఇంటికి కొందరు గుర్తు తెలియని వ్యక్తులు శుక్రవారం నిప్పు పెట్టినట్లుగా తెలుస్తోంది. ఆయన ఇంట్లోని ఫర్నీచర్, ఫ్లెక్సీలు దగ్ధమయ్యాయి. కొందరు దుండగులు ఆయన ఇంటి పైకి పెట్రోల్ బాటిల్ విసిరి నిప్పు పెట్టారని సమాచారం. మరోవైపు మహబూబాబాద్‌లో ఇల్లందు శాసనసభ్యుడు అబ్బయ్య వాహనం పైన టిఆర్ఎస్ కార్యకర్తలు దాడి చేశారు. వాహనం పాక్షికంగా దెబ్బతింది. ఆయన ఆ దాడి నుండి తప్పించుకొని పాలకుర్తి చేరుకున్నారు. నల్లబెల్లి మండలం రేలకుంటలో చంద్రబాబు పర్యటనకు స్వాగతం పలికేందుకు వస్తున్న టిడిపి కార్యకర్తలు ఉన్న బస్సును టిఆర్ఎస్ అడ్డుకుంది. ఆ బస్సుకు నిప్పు పెట్టినట్లుగా తెలుస్తోంది. చెన్నారావుపేటలోని టిడిపి కార్యకర్తలు వెళుతున్న బస్సును అడ్డుకొన్న టిఆర్ఎస్ కార్యకర్తలు బస్సు అద్దాలు ధ్వంసం చేశారు.

స్టేషన్ ఘనపూర్‌తో పాటు పలు ప్రాంతాల నుండి బాబు యాత్ర కోసం వస్తున్న బస్సులను టిఆర్ఎస్ అడ్డుకుంది. కాగా లక్ష్మక్కపల్లి నుండి చంద్రబాబు రైతు పోరు బాట ప్రారంభమైంది. అంతకుముందు హైదరాబాదు నుండి బయలుదేరిన బాబు కాన్వాయ్‌పై టిఆర్ఎస్ కార్యకర్తలు రెండుమూడు చోట్ల రాళ్లు రువ్వారు. అడ్డగించే ప్రయత్నాలు చేశారు. జనగాంలోనూ టిఆర్ఎస్, టిడిపి కార్యకర్తలు రెచ్చిపోయారు. జనగాం నుండి ఎలాంటి ఉద్రిక్త పరిస్థితులు ఎదురు కాలేదు. కాగా బాబు యాత్ర సందర్భంగా జరిగిన అరెస్టులను నిరసిస్తూ విద్యార్థి జెఏసి శనివారం బంద్‌కు పిలుపునిచ్చింది.

English summary

Unknown people set fire to TDP MLA Errabelli Dayakar Rao residence today.