బాబును నమ్మం, జగన్‌ను అడ్డుకుంటాం: కోదండరామ్

By Pratap

Published: Saturday, January 7, 2012, 15:13 [IST]

హైదరాబాద్: తెలంగాణపై తెలుగుదేశం పార్టీ అధ్యక్షుడు నారా చంద్రబాబు నాయుడిని తాము నమ్మబోమని, తెంలగాణలో వైయస్సార్ కాంగ్రెసు పార్టీ అధ్యక్షుడు వైయస్ జగన్ పర్యటనలను అడ్డుకుంటామని తెలంగాణ రాజకీయ జెఎసి చైర్మన్ కోదండరామ్ చెప్పారు. తెలంగాణపై వైయస్ జగన్ స్పష్టమైన ప్రకటన చేయాల్సిందేనని ఆయన శనివారం మీడియా ప్రతినిధుల సమావేశంలో అన్నారు. కాంగ్రెసును పాతరేయండి, తెలుగుదేశం పార్టీని నిలదీయండి అనే నినాదంతో తమ ఉద్యమం ముందుకు సాగుతుందని ఆయన చెప్పారు. వరంగల్‌లో జిల్లాలో చంద్రబాబును పర్యటించడానికి తెలుగుదేశం తెలంగాణ నేతలు ప్రదర్శించిన పట్టుదల తెలంగాణపై చూపిస్తే తెలంగాణ వచ్చి ఉండేదని ఆయన అన్నారు. తెలంగాణకు తాను అనుకూలమని చంద్రబాబు చెప్పినంత కాలం వ్యతిరేకమనే అర్థమని ఆయన అన్నారు.

ఆంధ్రలో బలం పెంచుకోవడానికి చంద్రబాబు తెలంగాణలో పర్యటిస్తున్నారని ఆయన అన్నారు. తెలంగాణ రాదని సీమాంధ్రకు చెందిన కోడెల శివప్రసాద రావు వంటి తెలుగుదేశం నాయకులు చెబుతున్నారని, వారు అంత స్పష్టంగా చెబుతుంటే చంద్రబాబు తెలంగాణకు అనుకూలం అనుకోవడానికి ఏమీ లేదని ఆయన అన్నారు. సీమాంధ్ర నాయకులు తెలంగాణలో వ్యక్తిగత పర్యటనలు చేస్తే తమకు అభ్యంతరం లేదని, రాజకీయ యాత్రలు చేస్తే మాత్రం అడ్డుకుంటామని ఆయన చెప్పారు. తెలుగుదేశం తెలంగాణ నాయకులు సీమాంధ్ర నాయకులను పల్లకీలో మోస్తున్నారని, వారిపై ఆశలు పెట్టుకోవాల్సిన అవసరం లేదని ఆయన అన్నారు.

Published On January 7, 2012