నన్ను అన్నాడు, కానీ చంద్రబాబే పోతున్నారు: కెసిఆర్

హైదరాబాద్: టిఆర్ఎస్ పార్టీ పెట్టినప్పుడు ఆరు నెలల్లో తాను అడ్రస్ లేకుండా పోతానని తెలుగుదేశం పార్టీ అధినేత నారా చంద్రబాబు నాయుడు అన్నారని, కాని త్వరలో ఆయన అడ్రస్ లేకుండా పోతుందని టిఆర్ఎస్ చీఫ్ కె చంద్రశేఖర రావు శనివారం అన్నారు. తెలంగాణ లెక్చరర్స్ ఫోరమ్ డైరీ, క్యాలెండర్‌ను ఆయన ఆవిష్కరించారు. ఈ సందర్భంగా ఆయన మాట్లాడారు. ప్రస్తుతం పులిమీద మనం స్వారీ చేస్తున్నామని, ఆపితే కనుగ ఆ పులి మనల్నే తినేయడం ఖాయమన్నారు. ఇంతదూరం వచ్చాక పొరపాటున తగ్గినా తొక్కేస్తారన్నారు. 1956, 1968లో తెలంగాణ రాష్ట్రాన్ని సాధించడంలో ఓడిపోయామని ఇప్పుడు మాత్రం గమ్యం చేరతామని ఆయన ధీమా వ్యక్తం చేశారు.

పదకొండు సంవత్సరాల వ్యవధిలో ఆంధ్రా, జాతీయ నాయకుల అంచనాలను మించి ఉద్యమాన్ని నిర్మించగలిగామని, ప్రస్తుతం మనకు జాతీయ పార్టీ భారతీయ జనతా పార్టీ అండ కూడా ఉందని ఆయన అన్నారు. ఇలాంటి సమయంలో మనం యాచించే స్థాయిలో కాకుండా శాసించే స్థాయిలో ఉండాలన్నారు. చంద్రబాబు అడ్రస్ త్వరలో గల్లవుతుందని, సీమాంధ్రలో కూడా ఆయనకు డిపాజిట్లు రావన్నారు.

English summary

TRS chief K Chandrasekhar Rao blamed TDP chief Nara Chandrababu Naidu for his comments on TRS when it was borned.