ఫాంహౌస్‌లో పడుకోలేదు: కెసిఆర్‌పై నారాయణ ఎద్దేవా

By Srinivas

Published: Monday, January 9, 2012, 12:10 [IST]

హైదరాబాద్: తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావుపై సిపిఐ రాష్ట్ర కార్యదర్శి నారాయణ సోమవారం విమర్శలు గుప్పించారు. పార్లమెంటులో తెలంగాణపై చర్చ వచ్చినప్పుడు మేము ఫాం హౌస్‌లో పడుకోలేదని ఎద్దేవా చేశారు. తెలంగాణ కోసమంటూనే పార్లమెంటు సమావేశాలు జరుగుతున్నప్పుడూ ఏం చేశారని ప్రశ్నించారు. ప్రజా సమస్యలు పక్కకెళ్తాయనే తాము తెలంగాణ అంశంపై ఉద్యమించడం లేదన్నారు. అయితే పార్లమెంటు స్థాయిలో మాత్రం తెలంగాణపై రాజీపడే ప్రసక్తి లేదన్నారు. ఇప్పటికే సభలో తెలంగాణపై తమ వాణి వినిపించామన్నారు. ఏం సాధించేందుకు శాసనసభ్యులు అరకు పర్యటనకు వెళుతున్నారని ఆయన ప్రశ్నించారు.

అరకు వెళ్లి వారు సాధించేది ఏమీ లేదని, అరకు సహజ సంపదను కొన్ని సంస్థలకు కట్టబెట్టేందుకే వెళుతున్నారన్నారు. గిరిజనులపై అంతగా ప్రేమ ఉంటే అదిలాబాద్‌కు ఎందుకు వెళ్లడం లేదని ప్రశ్నించారు. వారిది గిరిజనుల బతుకులపై విహార యాత్ర అని విమర్శించారు. గనులు దోచుకునే కుట్రలోనే పర్యటన జరుగుతుందని, దానిని సహించే ప్రసక్తి లేదన్నారు. ప్రస్తుతం సినీ రంగాన్ని కేవలం ఐదు కుటుంబాలే శాసిస్తున్నాయని ఆవేదన వ్యక్తం చేశారు.

Published On January 9, 2012