తొడి కొడితే మీసం ఊడుతుంది: బాలయ్యపై తులసిరెడ్డి

హైదరాబాద్: తొడ కొడితే మీసం ఊడుతుందని కాంగ్రెసు అధికార ప్రతినిధి తులసి రెడ్డి సినీ హీరో, తెలుగుదేశం పార్టీ నాయకుడు బాలకృష్ణను ఉద్దేశించి వ్యాఖ్యానించారు. తొడ కొడితే మీసం ఊడుతుంది కాబట్టి దాన్ని సరి చూసుకోవాలని ఆయన బాలయ్యకు సలహా ఇచ్చారు. బాలకృష్ణ తొడ కొట్టడం, మీసం మెలేయడం హాస్యాస్పదమని ఆయన సోమవారం మీడియా ప్రతినిధుల సమావేశంలో అన్నారు. బాలకృష్ణ రాజకీయాల్లోకి వచ్చి తెలుగుదేశం పార్టీ అధ్యక్షుడు నారా చంద్రబాబు నాయుడి కింద పనిచేస్తారా, ఆయన చీఫ్‌గా పనిచేస్తారా చెప్పాలని తులసి రెడ్డి అడిగారు. చంద్రబాబు కింద బాలకృష్ణ పనిచేస్తే అందులో విశేషమేమీ లేదని ఆయన అభిప్రాయపడ్డారు.

తెలుగుదేశం పార్టీ కోసం గత ఎన్నికల్లో కూడా బాలకృష్ణ ప్రచారం చేశారని, అప్పుడు ఎన్ని సీట్లు వచ్చాయో చెప్పాలని ఆయన అన్నారు. ఎన్టీ రామారావు ఆశయ సాధనకు కృషి చేస్తానని చెబుతున్న బాలకృష్ణ చంద్రబాబు నాయకత్వం కింద పనిచేస్తే పెద్దగా పట్టించుకోవాల్సిన అవసరం లేదని ఆయన అన్నారు. చంద్రబాబు విశ్వాస ఘాతకానికి పాల్పడ్డాడని బాలకృష్ణకు కూడా తెలుసునని ఆయన అన్నారు. వాస్తవాలు తెలుసుకుని బాలకృష్ణ మాట్లాడాలని ఆయన సూచించారు. 1983 పరిస్థితి 2014లో పునరావృతం కాదని ఆయన అన్నారు.

English summary

Congress leader Tulasi Reddy lashed out at hero and TDP leader Balakrishna.