తెలుగుదేశం పార్టీ గుర్తు సైకిల్ రంగు మారుతుంది?

హైదరాబాద్: తెలుగుదేశం పార్టీ గుర్తు సైకిల్ రంగు మారనున్నట్లుగా సమాచారం. నల్లని రంగు సైకిల్ ఇక మీదట ఆకుపచ్చ రంగులోకి మారనున్నట్లుగా తెలుస్తోంది. త్వరలో పార్టీ సభ్యత్వ నమోదు కార్యక్రమాలు ప్రారంభమవుతాయి. ఇప్పటి వరకు నలుగు రంగులో ఉన్న సైకిల్ గుర్తు రంగును ఈ నమోదు కార్యక్రమం నుండి ఆకుపచ్చ రంగులోకి మార్చనున్నట్లుగా సమాచారం. కొత్తగా నమోదు చేసుకున్న సభ్యులకు ఇచ్చే నమోదు కార్డులలో గుర్తు రంగు మారి వస్తుంది. నలుపు రంగు కలిసి రాలేదనే భావనతోనే పార్టీ సైకిల్ గుర్తు రంగును మార్చే పనిలో పడినట్లుగా కనిపిస్తోంది. ఆకుపచ్చ రంగు ఉంటే కలిసి రావడంతో పాటు రైతులకు అన్న భావన కూడా కలుగుతుందని ఆ పార్టీ నేతలు భావిస్తున్నారట.

కాగా వరుసగా రెండు సార్లు అధికారం చేజారడంతో తెలుగుదేశం పార్టీ అధినేత నారా చంద్రబాబు నాయుడు తన బావమరిది, హీరో బాలకృష్ణ సూచనల మేరకు ఎన్టీఆర్ ట్రస్టు భవనంలో వాస్తుమార్పులకు పచ్చజెండా ఊపిన విషయం తెలిసిందే. ఇటీవల పార్టీ కార్యాలయంలో జరిగిన వాస్తుమార్పులను బాలకృష్ణ దగ్గరుండి పర్యవేక్షించారు కూడా. అయితే సైకిల్ గుర్తు కూడా మారనున్నదనే వార్తల నేపథ్యంలో 2014లో అధికారం చేపట్టేందుకు అవసరమైన అన్ని అంశాలను చంద్రబాబు పరిగణలోకి తీసుకుంటున్నట్లుగా కనిపిస్తోంది.

English summary

It seems, Telugudesam Party symbol Cycle colour may changed black to green soon.