చిరంజీవి వర్గంలో తెలంగాణకు ఇవ్వండి: కడప నేతలు

By Srinivas

Published: Friday, January 13, 2012, 11:55 [IST]

న్యూఢిల్లీ: తిరుపతి శాసనసభ్యుడు చిరంజీవి వర్గానికి చెందిన శాసనమండలి సభ్యుడు సి.రామచంద్రయ్యకు కేబినెట్‌లో చోటు కల్పించవద్దని, అవసరమైతే తెలంగాణ ప్రాంతానికి చెందిన శాసనసభ్యులకు ఇవ్వాలని కడప జిల్లా కాంగ్రెసు నేతలు కేంద్ర మంత్రి, రాష్ట్ర వ్యవహారాల ఇంచార్జ్ గులాం నబీ ఆజాద్ వద్ద చెప్పినట్లుగా సమాచారం. మంత్రి డిఎల్ రవీంద్రా రెడ్డి, వీర శివా రెడ్డి, చెంగల్రాయుడు, అహ్మదుల్లా గురువారం రాత్రి ఆజాద్‌ను కలిశారు. ఎంపి వైయస్ జగన్మోహన్ రెడ్డి పార్టీ పెట్టడం వల్ల జిల్లాలో కాంగ్రెసుకు ఇప్పటికే కొంత నష్టం జరిగిందని, రామచంద్రయ్యకు పదవి ఇస్తే మరింత నష్టం జరిగే అవకాశముందని వారు ఆజాద్‌కు చెప్పినట్లుగా సమాచారం. ఆయనకు పదవి ఇస్తే తాము పదవులకు రాజీనామా చేయడానికి కూడా సిద్ధమేనని వారు ఒకింత ఘాటుగానే చెప్పినట్లుగా తెలుస్తోంది.

కాగా సి.రామచంద్రయ్యను కేబినెట్లోకి తీసుకుంటే సీనియర్ ఎమ్మెల్సీల పరిస్థితేంటని వారు అడిగినట్లుగా తెలుస్తోంది. తెలంగాణ ప్రాంతానికి చెందిన ఎమ్మెల్సీ డి శ్రీనివాస్ వంటి సీనియర్ నేతలకు పదవి ఇస్తే బావుంటుందని వారు ఆజాద్ వద్ద అభిప్రాయపడినట్లుగా తెలుస్తోంది. అయితే వారి ఫిర్యాదుకు స్పందించిన ఆజాద్ అన్నీ ఆలోచించిన తర్వాత పదవులు ఇస్తామని చెప్పారట. కాగా చిరంజీవి వర్గంలో ఇద్దరు కాపు వర్గానికి చెందిన వారినే కేబినెట్లోకి తీసుకోనున్నారనే అంశంపై రాష్ట్ర కాంగ్రెసు వర్గాలు కూడా అసంతృప్తితో ఉన్నాయని తెలుస్తోంది.

Published On January 13, 2012